العالم ماشي لقدام ونحنا راجعين لورا! – مهندسة ماكنات الطاقة بلودان أيوب عن مشروع المراوح

» - 05/03/2019

blodan

 اني أسمي بلودان أيوب، بتعلم بالمانيا هندسة ماكينات ومختصة بهندسة ماكينات إنتاج الطاقة الخضراء، اشتغلت بإيطاليا قبل سنة بكلية العلوم والابحاث بالطاقة، وبالوقت الحاضر بشتغل بشركة كهرباء بالمانيا..  يعني كل شي مشتغلتو ومتعلمتو بخص إنتاج الطاقة.

بصفتي بنت البلد وبهمني أمرها أكثر من أيّا حدا غريب، وبصفتي مهندسة..  بقلكون: مشروع المراوح رح يخربلنا بيوتنا وبلدنا وحياتنا، ورح تصير حياة ولادنا لبعدين شبه مستحيلي (بديش كثير فوت بالسياسة، بس هلّي بيفكر بشوية منطق، بيعرف انو إسرائيل ما نقّت الجولان لهذا المشروع عن طريق الصدفة، هني حاولو يستوطنو البلد بالقوة، وبس فشلو بالخطة قررو يعدمونا حياتنا لحتى نفل بكامل إرادتنا)، نحنا عالم عايشين من الزراعة، ومين فينا بيستناش ستني لتطلع الشمس لنروح نطفش بالطبيعة، ومين فينا فش عندو بيت بالمرج وبيقعد فيهو اكثر ما بيقعد ببيتو.. ها كلو رح تنسوه اذا بتسمحو بتنفيذ مشروع المراوح. الناس هلي ما بتشبع من المصاري رح يخربولنا حياتنا وحياة ولادنا عشان 6000 شيكل بالشهر.

بصفتي مهندسة، بأكدلكون إنو المراوح مشروع بيقص ذهب، بس هوذ المصاري مش راح تشوفو منهن شي، والناس هلي  باعت او أجّرت أراضيها ومفكري حالها عاملي “صفقة العمر”، بحب قلكون إنو المسؤولين عن المشروع طعموكون “مقلب مرتب” وإنتو رح تكونو أكثر المتضررين من المشروع من ناحيه إجتماعيه ومن خسارة الأراضي. بكل دول العالم الناس عبتتظاهر وتقاتل لتشيل المراوح هلي خربتلون صحتهن وحياتهن، ونحنا متل العادة؛ راجعين برجوع وما فينا نتعلم من أخطاء غيرنا.

.

Turb-1

“يعني لازم نغلط لنستوعب انو الشي غلط”

متذكرين قصة الأناتين تبع شركات التلفونات هلي كانت السبب بموت كثير ناس وبأبشع الأمراض، ونحنا وعينا على خطورة الموضوع، بس الوقت كان متأخر. اليوم تغير الشي، ونحنا عارفين خطورة المشروع على حياتنا وحياة ولادنا قبل ما يتم، وها الشي المنيح، لأنو لازم نوقف الغلط قبل ما يصير.

بالصور بدي وضحلكون كم مصيبي من المصايب هلي رح تنزل عراسنا اذا محركتوش حاكون بأسرع وقت ووقفتو ضد المشروع؛ ما حدا يقول: أني مخصنيش أو شو بيهمني، كلنا راح ناكلها سوى.. عشان هيك لازم كلنا نوقف بوجة هلي بيحاولو إستغلالنا واستغباءنا.

فرم الطيور وجذب الحيوانات البرية

المراوح فيها قوة سحب الهوا (شفط)، ومراوح بهاذا الحجم بتسحب الطيور هلي بتكون طايره عن بعد 300-500 متر، وبتفرمهن متل ما مبين بالصورة.

أكيد ما حدا فينا بحاجة لدروس بالإنسانية وكلنا بنعرف قديش الجريمة هذة بحق الطيور بشعة. حسب مؤسسة حماية الطبيعة بالمانيا، بيموت بحدود الـ 100 ألف حيوان بالسنة  بسبب المراوح. والحيوانات هلي متعودي على الهجرة عن طريق الجولان، بعد سنين طويلة، رح تكون معرضة للإنقراض أكثر من غيرها. الطيور رح تنفرم والحيوانات عالأرض مش راح يكون متوفر لإلها الأكل كيف كان كل السنين الماضيي. يعني ابشع من هيك جريمة افش، ومنشان شو! عشان كم واحد فجعانين مصاري يزيدو قبضتهن.

وكمان، اذا بدنا نفكر بالأراضي، لازم نعرق انها رح تصير مسلخ للطيور “الفطايس”، وهذا الشي رح يجذب الخنازير وحيوانات برية هلي مش موجودة بأراضينا بالوقت الحاضر. وشو الخنازير والحيوانات البرية رح تسوّي بالأراضي وبالنباتات والشجر؟؟ بدكنش مين يعلمكون. الخنازير رح تخرب النباريش تبع الري، رح تقضي على الشجر الصغير وكمان، مع الوقت، رح تستوطن الأراضي لانو بالنسبة الهن المنطقة بتوفر أكل “فطايس” بدون نهاية.

Turb-2

تأثير المراوح على الطبيعة، السياحة والحياة

صوت المراوح على مدى 24 ساعة باليوم، و365 يوم بالسنة، رح يسبب ضرر كبير على السياحة بالجولان.. السواح بيجو لعنّا لانهن حاسدينّا على الطبيعة والهدوء هلي عنا. بس لما يكون في صوت صرير كل الوقت وبكل محل بالبلد، ما حدا رح يجي يعمل سياحة ونقاهه عنّا، وهذا الشي رح يضر كثير من المحلات عنا بالبلد. نحنا كمان مش راح نقدر نطلع مشاوير على الطبيعة، لأنو المشوار رح يوجعلنا راسنا بدل ما نفضّي عن بالنا.

الجولان مش راح يكون قابل للسكن؛ الضرر تبع لمراوح رح يجبرنا نترك بيوتنا متل ما عبيصير بكثير مناطق بأوروبا، وطبعا هذا الهدف الأساسي لإسرائيل.

إسرائيل بدها تعمل الجولان مناطق صناعية؛ تستفيد من الغاز والميّ والتضاريس الجغرافية، بدون ما تضطر تقاسمنا عالمرابح، وأحسن حل إنهن يطفّشونا من بيوتنا. والأجمل أنو نطفش بكامل إيرادتنا ونبيع أراضينا وبيوتنا بتراب المصاري.

أكيد في منكون عبيقول: هذة مبالغة ومين رح يترك بيتو، بس فكّرو بالأجيال الزغيري بعد 20 سنة! ما حدا فيهون رح يكبر ويتربى على حب البلد.. رح يكبرو بمنطقة حتى الحيوانات مش قادري تعيش فيها. وحسب أبحاث المانيه، البيوت والأراضي بمناطق المراوح انباعت بـ 30% من سعرها الأصلي.

تأثير المراوح على الصحة الجسدية والعقلية

حركة المراوح المستمرة بتصدر موجات تحت صوتية، هلي نحنا لا منحسها ولا منسمعها، بس الجسم بيستقبلها، وعلى طول الوقت. هذه الموجات بتأثّر على الأذن الوسطى؛ الشي هلي رح يسبب خلل بالتوازن، صرع، خرف مبكّر، وجع راس مزمن وقلة تركيز. يعني الشي رح يأثر على شغلنا وتعليمنا كمان. اتفكروش بحالكون.. فكّرو بالأجيال الزغيري هلي رح تخلق وتكبر مع هالشي، يعني رح يصير عنا حالة “غباء” عند كل الأجيال الجديدة.

تأثير الأمواج تحت الصوتية البطيئة على الجسم ممكن توصل بأسواء الحالات لنزيف بالاعضاء الداخلية، لانها بتعمل متل اهتزازات (رجّات) جوات الجسم، مع ارتفاع بضغط الدم.

ملاحظة: الأمواج تحت الصوتية تم إكتشافها خلال ستينيات القرن العشرين من عالم فرنسي صار عندو مشاكل بالسمع بسبب مروحة كانت موجودة بمعملو.

الأمواج فوق الصوتية اللي نحنا منقدر نسمعها، رح بتكون بدون أنقطاع، وهذا شي بيأثر على الحالة النفسية والعقلية، يعني اذا مرقو كم سيارة من حد البيت عبتضيق خلاقنا.. كيف بدنا نقدر نتحمل صوت صرير 24 ساعة.

المكان المناسب لاستغلال طاقة الرياح هو داخل البحر، بعيد عن الناس، عشان الأضرار تبع المراوح ما تأثرش علينا. كمان بسبب الحوادث هللي ممكن تصير في هذه المراوح متل انفجار او حريق.

Turb-3

علّق على المادة:

لن يتم نشر عنوان بريدك الإلكتروني. الحقول الإلزامية مشار إليها بـ *

* إقرأ شروط التعقيب في الموقع

  • المرسل:  احمد

    مقالة متل ها لازم تنشر عاوسع نطاق والكل يقراها ويفهمها منيح ومنيح ومنيح والمشروع ها باطل لو كلف ارواح

  • المرسل:  حنان فخر الدين

    شكرا بلودان على المعلومات ونشالله الناس الي ما كانت تشبع القرش تشبع وتخلصنا

  • المرسل:  جولانية

    يسلمو ثمك بنا ناس تفهم هلشي ونحافض على مستقبل هل بشر

  • المرسل:  سوسن

    شكرا إلك بلودان على المعلومات يلي قدمتيها منشكر الله انو في عنا جيل واعي وعبفكر بمصالح البلد بتمنى رسالتك توصل لكل الناس ليفهمو مدى خطورة هاذا الشي.

  • المرسل:  منذر ابراهبم

    كل الاحترام لمهندستنا.وانشالله رسالتك توصل والناس توعى على الخطر والضرر الي عبيستناها.

  • المرسل:  الهام خاطر

    شكرا الك على هذا الشرح وانا بطلب من كل الناس الي عم تحكي وتروج للمشروع تستوعب هذا الحكي من انسانة مختصه بهذا الموضوع وعم تحكي من غير ولا اي مصلحه شخصيه واذا بعد في ناس مخلصه ومحبه لهذه المنطقه ولحياة الاجيال القادمة تقوم وتمنع هذا المشروع المدمر النا والمستفيد الوحيد منه شركة المراوح على حسابنا

  • المرسل:  مهتم

    عبتحكي جواهر يا بلودان الله ينجحك وبالتوفيق لانو قلبك على هلبلد

  • المرسل:  مسعده.

    كل الاحترام.
    بدنا نفيق

  • المرسل:  بنت البلد

    يعطيكي العافيه بلودان ! جداً مهم المقال

  • المرسل:  بقعاثا

    كلام سليم 100% ناس فجعاني على المصاري ويا سبحان الله صار الي بدو يأجر صار يفهم وعامل حالو بروفيسور.يعني بيهمو وحالو والباقي يتدمر اهم شي جيبتو تتعبى

  • المرسل:  ابن البلد

    البس الذي يلحس المبرد هذا حال من يقوم بتاجير ارضه من اجل اقامه المراوح لان حاله كحال القط الذي يلعق المبرد ضاننا انه يلتهم وجبه شهيه ولكن حاله انه يلتهم لحم ودم لسانه. يا اخوان ان الدافع من وراء تاجير الارض هو الربح المادي ليس الا ولكن بحساب بسيط يعرفه طالب ابتدائى متوسط الذكاء نصل الى التالي على فرض ان المزارع الذي اجر قسم من ارضه لاقامه المروحه يملك حوالي 10 دونمات فان القيمه السوقيه لارضه اليوم تساوي حوالي المليون شيقل تقريبا. وان المردود المادي الذي ياخذه من الشركه هو 40000شيقل في العام ברוטו يعني قبل خصم الضرائب وللعلم قانون الايجار ضريبته حوالي30 بالمائه يعني ان ما سيحصل عليه المزارع وورثته من بعده خلال 24عام و11 شهر لن يصل الى المبلغ الذي سيخسره من تراجع قيمه الارض نتيجه لاقامه عذه الاشباح يعني كما قال اجدادنا الذين حافظوا على الارض والعرض بدمائهم كانك يا ابو زيد ما غزيت. والله من وراء القصد

  • المرسل:  ماجد ايوب…المغار

    كل الاحترام الك يا بلودان،كلامك صحيح ميه بالميه

  • المرسل:  Wadeeh Ebrahem

    كل الاحترام الك على هذة المعلومات بس يفهم لكبير بلد بيقتنع الصغير

  • المرسل:  ماجد الشاعر

    كل الشكر الك بلودان على هلتوضيح
    وبأمل انه الكل يقرأ هل كلمات الرائعه
    والحقيقيه بأخطار المراوح

  • المرسل:  Eiad A. Maddah

    شكرا يا بلودان على هذا التوضيح. بالتوفيق دائما.

  • المرسل:  Almaza Halabi Khater

    شكرا الك على التوضيح وعلى خوفك على مصلحة البلد

  • المرسل:  جولانيه

    كل الاخترام بلودان انتي انسانه فهماني وكل واحد بيفكر بلمصاري وبتهموش صحت اهل بلدو والاهم صحت اهل بيتو ها انسان فجعان ومتخلف يا ريت توصل الرسالي يلي حابي توصليها ويفهموها

  • المرسل:  كمال ابو سعده

    كل احترام الك . واحنا ضد هذا مشروع

  • المرسل:  فايد زهرالدين

    يا بنتي يا بلودان : بالرغم من صدق نواياكي وتفهمك المهني لموضوع المراوح المشؤوم بقلك :(سرسبتينا أكثر منحنا مسرسبين ) . شو طالع بايدنا على أصحاب المطامع والجشع المادي والمعنوي بالمنطقة يلي ما بهمن ، مثل ما تفضلتي ، غير المصاري (يضر ولا يفوت ) الله يا بنتي، يكون بعونا ويقدرنا على منع هالمصيبة يلي بتهدد صحتنا ، مصيرنا ومصير أولادنا وأحفادنا من بعدنا ، يا ريت الكل بفكرو بالعواقب الوخيمة الناتجة عن محنة المراوح ، وبالتالي يا بنتي المحترمي المقدر من الله نافذ والله يكون بعونا جميعا ، ألف شكر الك على هالشعور النبيل اتجاه أهلك وأحبابك بالجولان ، كثر الله من أمثالك . مع كل الاحترام والتقدير : عمك فايد .

  • المرسل:  اشرف داود

    معلومات قيّمه ومفيده .. شكرا عزيزتي بلودان على هذه التوعية والتحذير .

  • المرسل:  علاء ابراهيم

    اني بقترح نقوم بجمع مبلغ من البلد وتعويض المتضرر من عدم اقامت المشروع وخليها تنحل سلمي وبالنهاي هلي موافق على المشروع هدفو المادي فقط فخليها تنفدا بالمصاري

  • المرسل:  اديل فخرالدين

    شكرًا كثير بلودان على المعلومات القيمه. هذا المقال اجاب على اسئله كثير كنت اسألها لمن كنت شوف المراوح بكالفورنيا. مناطق وتضاريس كالفورنيا غنيه عن التعاريف بما فيها من محلات حلوه بس كل المناطق هلي بتتواجد فيها مرواح هي مناطق غير مأهوله وخاليه كليا من السكان.

  • المرسل:  ازهار

    كل الاحترام الك بلودان على كل شي قدمتي لالنا شكرا

  • المرسل:  رائد ابو صالح

    اولا شكرا لمعلوماتك الهامة اختي بلودان ولولا غيرتك على بلدك واهلها ما تطرقتي لهذا الموضوع جزاك الله خيرا ام بالنسبه للذين باعو ارضهم وكرامتهم ووطنيتهم من اجل حفله من الدولارات سيأتي اليوم ويموتون ندما واعذر من انذر اما اهالينا الشرفاء شوفي اسا شو بيعملو. بدي بلش احكي بالعاميه اعذريني بيبلشو اجتماعات وهتافات ووقفات بالساحه واستنكارات واحتجاجات مثل ما صار بمشروع الوقف اكيد سمعتي عنه 12 سنه احتجاجات وشجب واجتماعات وبالاخر كانت النتيجه فتحنا طرق لحرامية الاراضي هلي سرقوا وقف مجدل شمس هلي الي والك وبيعو بمئات الاف الدولارات ونحنا نقول يا الله يا ريت هالشي ما صار وكنا واعين صرنا نندب حضنا ونبكي اسا نفس الكره لكن بموضوع اخر وهو المراوح. فيقو عيد يا اصحاب الشرف والكرامه حتى لا يفوت القطار ونندم لكن المره اندم لا ينفع صدقوني هون مستقبلنا ومستقبل ولادنا وجتمعنا ووطننا وشكرا لكم

  • المرسل:  مزيد مسعود

    أوﻻ شكرا لك بلودان وأتمنى لك النجاح والتوفيق في عملك ودراستك وكلي أمل هذا التوضيح الذي أنزلتيه عن مشروع المراوح الذي سيقام على أراضي الجوﻻنيين
    (الطاقه الخضراء()يلقى أذان صاغيه وعقول واعيه في جوﻻننا الغالي ويلفت إنتباه المروجين والداعمين لهذا المشروع للأخطار الجسيمه التي سيجلبونها لبلدهم وأهلهم ويعودو إلى رشدهم وتستيقظ ضمائرهم ليهدأ بالنا ونطمئن على أجيالنا ونحميهم ونضمن لهم مستقبلا آمن….
    ندعوا أخوننا الشرفاء بالجوﻻن للوقوف صفا واحدا بوجه هذه المؤامره التي أحاكها وبكل أسف أفراد من الجوﻻن ضد أهلهم ومجتمعهم الجوﻻني العام …
    فلا يقبل ولا يعقل أن حفنة من المستفدين تفرض هيمنتها على مجتمع عرف عنه الوفاء واﻹنتماء لوطنه وأرضه وعرضه وحفظ كرامته وهذه )(الحفنه المستفيده()أن تقرر لهذا المجتمع مستقبله بخدمة مشروع عدواني يهدف لسلب آراضينا وإرغامنا للتخلي عن أغلى قيمنا وشكرا

  • المرسل:  ابن لبلد

    كل لاحترام

  • المرسل:  مسعده

    كلام جواهر بلودان
    لكن هلي مفكر انو بس الحكي بينفع بيكون غلطان
    لازم يكون في تحرك على مستوى أوسع واقوى
    حتى يتعالج الأمر كما يجب
    جميع الاشخاص الداعمين والمستفيدين من المشروع معروفين لنا جميعا
    فلم يبقى الا ان نخطو الخطوه الاولى لمنع هذا المشروع من التنفيذ

  • المرسل:  سلمان ابو عواد

    تحية طيبة للمهندسة بلودان.
    لكني اعتقد انها لم تتطرق للموضوع بشكل علمي
    كنت اتوقع المزيد من مهندس متخصص بالطاقة الخضراء.
    لكل مروحة حسب ما قرأت تأثير لمحيط معين, لذا بامكاننا تحديد مناطق محرمة او ممنوعة للمراوح لضمان عدم تأثيرها على السكان مع الاخذ بعين الاعتبار اتساع القرى في الخمسين سنة القادمة.
    فاذا بقي مناطق للمراوح وهو احتمال ضئيل, فما هو المانع؟
    حسب رايي ادعاء تاثير المراوح على الطيور هو ادعاء ضعيف, خصوصا انه لا توجد خطوط هجرة للطيور في منطقتنا بل هي اكثر في الحولة.
    العشوائيات الموجودة في المرج لا تمت للطبيعة والجمال باي صلة.
    نحن لم نعد بلد زراعي, امتلاك اسرة لدونم او دونمان تفاح او كرز لا يعني انك بلد زراعي.
    مصادر الدخل اليوم هي من العمل بشهادات جامعية او خدماتية او من مجال اعمال البناء والعمل في المصانع.

    اما بالنسبة للحفاظ على البيئة, فنحن نقوم برش شجرة التفاح من عشرين الى خمسة وعشرين مرة في السنة مع كل تاثيرها على البيئة, ناهيك عن طائرة الرش التي تعمل على مدار الساعة كل ايام الصيف.
    بالاضافة الى حرق ما ينتج عن تقليم الاشجار والكم الهائل من المزابل العشوائية التي تحيط بقرانا.

    انا لا أؤيد فكرة المراوح او ارفضها لانه ليست لدي الصورة والمعلومات الكافية, لكن الامور بحاجة لتعمق اكثر.

    وعلى سبيل المثال نحن نرفض انتينات الجوال ولكن بنفس الوقت لا نريد ان نستغني عن التلفونات المحمولة, واذا كان هناك مشكلة في التغطية لاحدى الشركات نقوم بالانتقال مباشرة لشركة اخرى ذات تغطية افضل, لاننا نريد تغطية في كل مكان حتى داخل عشوائياتنا في المرج.

    • المرسل:  مزارع حر

      اخ سلمان اعتقد ان ابنتنا بلودان ملمه بالموضوع بكل جوانبه ولو كانت تود ان تتطرق للموضوع بشكل دقيق من سيئات وحسنات لحتاجت الى كتاب من الحجم الكبير لكنها اختصرت وقالت ان البيب من الإشارة يفهم.
      موضع المراوح يجب ان يحارب بكل قوه وكذلك الامر الذين يدعمون المشروع والذين فتحو لهم مكتب
      لماذا اختاروا القرى الدرزيه بسب الرياح يا لها من كذبه
      لماذا لم يبنو المراوح في جبل الجرمق مفتوح للرياح الاربع باب الهوا او مروم جولان تل فرس تل كناف تل ابو الندى يا سبحان الله بس في قرى الجولان يوجد رياح
      فليعلم الجميع ان مكومة اسرائيل تود تهجير سكان الجولان ولهذا السبب تريد اقامة المراوح اود ان أؤكد لك ان المشروع سوف يفشل لكن المرتزقه من اهل الجولان بدأو في تحضير أوراق جديده ليقدموها الى حكومة اسرائيل من اجل حفنه من النقود اليوم بدأو يهمسون في أذان اسيادهم ان الأراضي التي في حوزة المزارعبن هي اراضي متروكه وسكان الجولان ليس موجود معهن اثبات ان هذه الأرض ملك لهم وهكذا يمكن للحكومه ان تصادر اراضيهم اكراها

  • المرسل:  اياد

    انا مع كل كلمه كتبت
    لا اعتقد ان اسرائيل والسلطه تفرط بهكذا مشروع وتقدمه على طبق من ذهب لاهل بلدي لو ما كان يحمل اضرار وخراب بيوت
    المشكله بلناس اللي مستعده تبيع اولادها كرمال حفنة شواقل
    وبلاخر راح يدفعو الثمن من صحتهن وصحة ولادهن واحفادهن يا عيب الشوم ويا حيف على كل واحد بتسولو نفسو يقدم على هيك خطوه

  • المرسل:  جولاني. مع عدم الانحياز

    ان من اهم العوامل والتي عملت على تجذرنا بالجولان هي ثروتنا النباتيه ولكن حسب مقالة الاخت مشكوره عليه سوف تقتلعنا المراوح من ارضنا وتنثرنا في اقاصي الارض وادناها الهذه الدرجه اعمانا حب المال. اتقوا الله

  • المرسل:  غازية منصور الغجري

    اسلوب صهيوني ممنهج لتهجير أهل الجولان الأصليين
    أو التخلص منهم بتفشي الفقر و المرض النفسي والعقلي والجسدي .

    يجب منع هذا المشروع الذي يخالف حقوق الإنسان

  • المرسل:  اياد

    طبعا ضرر المشروع واضح علينا وعلى الجيل القادم
    بس يا حيف على اللي مستعد يبيع حالو وناس بلدو بحفنة مصاري

  • المرسل:  معضاد ابو صالح

    كل اﻻحترام لكي على هذه المعلومات لاكن تفرجو مين هلي خاتمين على المشروع ومن هم بل مجتمع يعني مثل المنشار فايتين اكلين وطالعين اكلي وعل وجهين وين اهلي هضبة الجوﻻن وين اضراب 82 ستت اشهر وﻻهالي يد واحده يا جماعه يا اخوان اذا هيك مشروع واقليه ماضيين عليه فقط ليتمتعو على حساب اﻻخرين وعلى حساب اوﻻدنا وارزاقنا وما حدا يطلع يقلنا على دمي وعلى جثثنا اذا مشي هيك مشروع بتكون هضبة الجوﻻن ﻻعاد فيها زلم وﻻ قرارات وﻻزم نبعث اوﻻدنا عل جيش ﻻنو الدوله افضل من واحد عايش بيناتنا وعم ينضر على الناس ونن تحت لتحت بائع اهلو وشعبو ومجتمعو مقابل العمله والجيب يا حيففففغغف لوين وصلنا

  • المرسل:  حمد

    كلام سليم لا غبار عليه وماخوذ من الواقع بس صحاب النفوس الضعيفه اللي بتلحق حفنة مصاري بتبقى ضعيفه وما بيهمها حدا وبالاخر ما يمليها الا التراب .

  • المرسل:  مرام

    الى اصحاب الضمائر الميتة الى متى تتاجرون بأرواح وصحة الناس من اجل مصالحكم وجيوبكم التي لا تشبع اذا كان ينقصكم البعض من المال ستنجمع لكم تبرعات وشكرا

    x
  • x
  • x
    جميع الحقوق محفوظة لموقع " جولاني". يمنع إستخدام اي مادة من مواد الموقع دون اذن خطي من إدارة الموقع
      لافضل تصفح للموقع يرجي استعمال Chrome او Firefox او Internet explorer 9 او احدث



    عرض نسخة المحمول