تخريب مثير للاستهجان في الحديقة العامة في مجدل شمس

» جولاني - 29/04/2015

20150429_121653

شجرة اقتلعت من مكانها في الحديقة

طالب أهالي مجدل شمس على مدى سنوات طويلة بأن يكون لديهم حديقة عامة، وقد تحققت هذه الأمنية أخيراً، لهذا من غير المفهوم، بل المستهجن، أن يقوم بعض الأشخاص بالتخريب المتعمد لهذه الحديقة.

عمليات التخريب في الممتلكات العامة ليست جديدة علينا، ويبدو أنها نتاج ثقافة مغروسة عميقاً فينا، وتحتاج إلى جهد تربوي هائل لاقتلاعها والخلاص منها.

يقول أحد الأشخاص الذي تواجد في الحديقة وساءه ما رآه من تخريب فيها:

“السؤال المحير هو من ذا الذي يقدم على اقتلاع شجرة من الحديقة العامة؟!

من يملك هذا القدر من اللؤم لاقتلاع وردة جورية مزروعة فيها؟!

لماذا يقدم شخص على تخريب وتقطيع تمديدات شبكة الري في الحديقة؟!

أسئلة تثير الحيرة والدهشة، حول ماهية هؤلاء الأشخاص القادرين على القيام بهذه الأعمال السيئة، فالحديقة هي ملك لك ولي ولكل الأهالي، وليست ملكا لأحد بعينه، فمن تغيض أيها “الأبله” عندما تخربها؟!

الحديقة رائعة، أضافت جمالاً على البلدة، وأصبحت المكان الوحيد الذي تستطيع العائلات الخروج إليه مع الأطفال لقضاء الوقت، خاصة في ليالي الصيف الحارة، فلماذا نخربها؟!”

20150429_122023

الجنائني أنيل خنجر: مؤسف أن الناس لا تهمهم المصلحة العامة!

ويقول الجنائني أنيل خنجر، المسؤول عن صيانة الحديقة، وهو يعمل على إصلاح بعض الأضرار وتجهيز الحديقة لموسم الربيع:

“مؤسف ما نراه من خراب. هذا الخراب ليس نتيجة عمل شخص معين لمرة واحدة، بل هو نتيجة عمليات تخريب قام بها عدد من الأشخاص خلال الأشهر الأخيرة، وهو ما يجعل الأمر مؤسفاً أكثر، ذلك لأن هذا يدل على أن أشخاصا كثر قاموا بالتخريب هنا، ويدل على عقلية الناس الذين لا تهمهم المصلحة العامة والممتلكات العامة في البلد، وهذا خطير جداً ومحزن.

محزن أن يقتلع شخص شجرة لمجرد أنها جميلة ويستطيع الناس الاحتماء بظلها أيام الصيف الحارة! محزن أن يقتلع شخص وردة جورية لمجرد أن منظرها جميل وتفوح منها رائحة عطرة!”.

وأضاف السيد أنيل:

“أتوجه للناس بأن يحافظوا على الحديقة فهي لهم، وإبقاؤها بهذا الجمال يتطلب منا عملاً شاقاً ومضنياً والكثير من الاموال، ولا يزال هناك الكثير من الأشياء التي ستضاف على الحديقة ستجعلها مكاناً جميلاً ومقصداً لكل أهالي البلدة. أتوجه للناس باستخدام الممرات المخصصة للسير، وعدم السير على العشب أو الأماكن المزروعة بالورد والزهور، فهذا يؤدي إلى خرابها والكثير من الوقت لكي تنمو من جديد”.

كذلك طالب عدد من الأشخاص الذين تواجدوا في المكان، وأغضبهم ما شاهدوه من خراب، أن توضع في كاميرات مراقبة، لمعرفة الأشخاص الذين يقومون بعمليات التخريب وتقديم شكاوى ضدهم.

من المؤسف حقاً أننا لم نرق بعد إلى المستوى الذي نعرف فيه أن الممتلكات العامة هي من مسؤولية كل فرد فينا، والمحافظة عليها يجب أن تكون كما المحافظة على أملاكنا الخاصة، ففي النهاية الأملاك العامة هي ملك لكل فرد فينا، ونستفيد منها جميعاً.

20150429_121727

كم يبلغ ثمن “رشاش” المياه لكي يسرقه أحدهم؟!

20150429_121744

كم يجب أن يملك الإنسان من لؤم لكي يكسر هذه الشجرة؟!

20150429_121806

هنا كانت شجرة!

20150429_121835

شجرة انحنت بهذا الشكل نتيجة تمرجح الأولاد عليها

20150429_121855

شجرة انحنت بهذا الشكل نتيجة تمرجح الأولاد عليها

20150429_121919

20150429_122210

وردة جورية اقتلعت من جذورها

20150429_122404

 

  • المرسل:  layla

    المثير للاستهجان اكثر كيف اقتحام وتخريب لصف بستان ما بتحكو عنو وعن الحديقه العامه بينحكا !!!!!

  • المرسل:  نائله

    والمثير انو هلي عبقومو بالتخريب اولاد وبوقت متاخر يعني بعد الساعه عشره لان من كوم يوم كانو عبخربو بالابتدائيه أ حتى سطال الزبالي ما سلمت منن وين اهاليهن بهالوقت نحنا بالحاره وكان وقت مدرسي كيف بنا نام من ضجتهن وثاني يوم مدرسي

  • المرسل:  ahmd

    عذرا علا بشاعه المنظر
    غريب من ذاك الشخص الذي يفرح لرؤيه الخراب وادمار بمكان الورود والطبيعه .
    هذل عمل اجرامي يجب التحقيق فيه
    ل layla…..هذه العمل وذاك هما سيان وبالفعل يجي ايقاف مثل هذه الافعال

  • المرسل:  غير معروف

    لو محل هلحديقا عملتولنا مستشفا قديش احسن وافضل هلشي
    في ملااان ملااان دكاترا بلهضبي وفيهون يشتغلو فيه.
    بدل مكل ميصخون ولد نبعثو على صفد كنا منجيبو لهون

    • المرسل:  مُقاول وليس كبلان

      إن أهمية المستشفى لا تفوق أهمية الحديقة!
      وكون أن هنالك عدد “كبير” من الأطباء، لا يعني أن يكون الحل هو فتح مستشفى!

    • المرسل:  ..........

      اني معك لانو كل مصخن حدا بنا نروح عاخر الدنيا يا عصفد او عحيفا وفي بالهضبة محلات واسعه للمستشفى مش مهم تكون بالمجدل او بقعاثا او عين قنية او مسعده المهم محل يكون قريب علينا . والحديقة مهمة كمان بس مش اهم من المستشفى.

    • المرسل:  ...

      كل اهل ينتبهو لولادن وينتبهو وين عبيروحو ووين عبيجو
      عيب هيك صار الشي زايد عن حدو
      مش اول مرة بيصير خراب
      ها غير تفقيع الالغام على العشب الي ممكن يشعل بأي لحظة (باوقات الاعياد)
      اكيد ماجاش حدا كبير او غريب خرب
      ولد وطفالا
      اني بس مستغربي كيف الاهالي الي بيضلن ولادن لل12 بالليل ومرات للوحدي برات البيت وعالطرقان
      انو كيف بتقبلو وبتسألوش عنن يعني؟؟
      فيكن تقولو حرية شخصيي
      بس هيك انتو عبتعرضو باقي الناس للخطر
      ورا المدارس كمان عبيضل في شباب عبتشرب وتدخن
      انو كيف بدو يأمن الواحد لابنو يروح عالمدرسي وعلب الدخان وقزاز قناني المشروب بالارض ….

  • المرسل:  Tagreed Awad

    الى متى هذه الافعال

  • المرسل:  فقير من مسعده

    للاسف على هيك اجيال ثم الاسف انا من الاشخاص الي بحب هاذي الامور بالاخص الحدائق العامه لا يوجد كاميرات في هاذا المكان او كاميرات بالمباني الذي امامهم هل يتصرف هاذا التصرف في منزله او بالاحرا بمنزل اهله

    • المرسل:  مهتم

      وهل علينا تربية اولادنا على الخوف والرعب ونقنعهم انهم مراقبين دوما كي لا يقوموا باعمالا فضة كهذه، أم أن نبني جيلا على قدر كاف من الوعي والادراك لعدم التفكير حتى بهذا السلوك العنيف.
      حسب رأيي من يترك اولاده لتربية الشارع سيكون سلوكهم بهذا الشكل ، فالام والاب من يقررا سلوك ابنهم.

  • المرسل:  حسناء

    هذا هو مجتمع تربيه فاشله اذا بتحبو بصورلكون سيارتي جبتها جديده وتشوفو حقاره العالم والعنف الموجود وتربيه الصحيحه شو عاملين فيها رسمين على سياره بشريطه حديد.مجتمع فاشل وتربيه افشل مع احترام لكل مجتمعنا بس بهمو يسهر ويلبس ويسافر غير هيك يبعث الله

  • المرسل:  &&&

    فعلا شي محزن ..الله يقدر عالصبر ..ايمتى الموقف يا اخوان؟

  • المرسل:  روشان

    يا عيب الشوم على هيك تصرف .. لازم ينعرف و ياخذو نصيبو بنص ساحة مجدل شمس

  • المرسل:  بنت البلد

    من المؤسف بالنسبة لي للوضع يلي وصلنالوا بهالبلد.صار هم بعض الاهل شو ياكلوا وشويشربوا ويسافر من بلد لبلد .وين رحنا وجينا وشو شترينا ملابس ومكياجات ومنكير وأظافر جديدة وللاسف فش معهن بس ولو دقيقة يجلسوا فيها مع ولادهن ويحسنوا تربيتهن .العنف يلي موجود بهالبلد عند بعض الاولاد غريب وعجيب .ولاد سهراني لآخر الليل وفش أهل تلمهن عن الطرقات على أساس معش فينا نمون على ولد عنجد شي مقرف وأقرف من القرف نفسوا يلي وصلنالوا بهالبلد ومن كل النواحي طبعن…..

  • المرسل:  سعادابو صالح

    الحقيقه !! عندما راينا بلدتنا اصبح فيها الحديقه العامه والورود مزروعه فيها واصبحنا نرى مظاهر الحظاره موجوده في بعض الاماكن بتنا نفتخر ببلدتنا
    و برئيسنا الذي يعمل اكثر من وسعه لراحة المجتمع والناس ويفي بكل التزام يتطلب منه الاهتمام . ولكن كل شيء له كفايه وكماله هذا العمل حسب رئيي هو المراقبه والكمرات والحراسه حتى يتعود الناس والاولاد خاصةً الواعين منهم يعني من هم في سن الراهقه حيث الاهل يسيبوهم على اساس ان هذا الفتى اصبح واعي وهم واثقون من تربيته فيتركونه يسيح في الليالي وهن يذهبون الى النوم المبكر او السهر خارج البلده الى وقت متاءخر وهكذا يتسلون بالتخريب على اساس لا احد يراهم او يعرفهم .. وانا شخصياً صيحت اكثر من مره على اولاد يتمرجحون باشجار صغيره في الحديقه
    وكنت الاقي منهم رداً بوقاحه بانه حر وليس لي دخل بما يفعله وبالامس كنا نّلعب احفادنا الصغار
    بالزحلوقه فوجنا ان هناك بنات كبار يلعبون بالزحاليق
    ولكن بشكل معاكس وعندما قلنا لهم هذا لا يجوز لان في الزحلوقه بنات صغار ممكن ان يتاءذو من ذلك
    فصوخو بوجوهنا بكل وقاحه ولن يردو علينا الا بعد ان هددناهم بانه سننادي لاحد من المجلس بمنعهم من اللعب .. وانا حسب رئيي ان الممتلكات العامه بحاجه الى مراقبه وعقاب كل من يفعل اي شيء غلط بالبلده ..

  • المرسل:  مواطنه من المجدل

    بدي قول فش داعي نتساءل كثير. تخريب الممتلكات العامه هي حقيقه مثبته علميا. لاشخاص عندهن حاله نفسيه كبار او صغار . هلي هني بيحسو انهن ضعاف ومش قادرين يواجهو يلي اقوى منهم. بيقومو بيعملو شي متل تخريب الاشياء الجماد هلي يحسسهن انهن اقوياء وقادرين علمواجهه. فش داعي اساله كثير هي الناس او الولاد لازم تتعالج وينعرف سبب مشكلتهن.

  • المرسل:  متابع

    هاذا صار شي طبيعي عنا بالبلد حتى هوذي الاولاد معش عليهن عتب لانو هيك تعودو من وهن وصغار بس حرام عهالتربيي

  • المرسل:  غير معروف

    الشي عبيصير بساعات الليل المتاخره نحن من لحاره ومنسمع اصوات التكسير عدا عن هيك في ولاد بيقوفو فوق الالعاب عللحفه وبيزتو حجار من فوق لتحت وهيك حجر عن حجر بيكسرو الزحاليق وهشي مش مرغوب للحدقيه صارت مكان عام عبيجي علبها ناس من برات البلاد بيكونو هون بل بلد وبيمرقو ولادن يلعبو بالالعاب واني حسب وجته نضري لازم ينحط مراقب للحديقه …شكرا الكن

  • المرسل:  موااطن من مسعده

    اانتو بالمجدل بعدكن بالف خير عنا بمسعده بالحديقه العامه الدمار كنو بالخشب او بالحديد وتعو شوفو الزباله في حاويتين صغار وحاويه كبيره وماا حدا بيحط فيهن بجمععوهن بالسلل الصغار اسا بتقولو وين عمال االمجلس وبنرجع عالملعب يوم يوم فوق ال100 ولد مزبوط الملعب للعب بس الديشه لازم ترتاح 3 ايام بالاسبوع واهم شي كان في ولاد بيتسلقو على عمدان الكهرباء بالملعب بتحكي مع الولد ااول جواب شو دخلك وكنك زلمي مد ايدك ونحمد الله على كل شيء

  • المرسل:  واحد

    مش شرط يكون الفاعل من البلد! عطول في ناس غريبة بالبلد ولساعات متأخرة بالليل .

  • المرسل:  الجده--

    قومو انظرو لبعيد على عبصير بسوريه وبلبنان وانتو عبتقلعو الفرحه من قلوب اطفالنا وتخربو المي هلي عم تسقي الورود هلي بتزرع الفرحه لبلدنا اصحو على حالكم وخلص بيكفي بحياتكون

  • المرسل:  &&&

    فعلا يلي استحوا ماتوا..قلعولكن عشبه فضحتونا ولكن ناس وشعوب عبتنقلع من بيوتها وبتتشرد وشهدا عبتسقط على مدار الساعه…بعدين قبل متنزرع العشبه تبعكن وتنقلع كان في مبنى محلها تبرعوا فيه ناس ليخدمكون ويخدم اولادكن قلعوه من شروشو بسبب الخبث والعصبيه العائليه والاستقواء بالمحتل..ما حكيتوا عليه ..اسا على شو عبتبكوا؟؟؟..بيكفي مهازل عاد!!

    • المرسل:  حسام

      لو بس بتحل عنا انت والمبنى تبعك بدكون تعمروا مستشفى ولا عيادة تفضل ما حدا مانعك عمال حملة تبرعات وجماع مصاري والوقف بيعطيكون ارض وين بدكون وحطوا القارمي اللي بدكون اياها قالولكون اياها مية مره
      كل ما دق الكوز بالجره بنسمع نفس النغمي تفضلوا تبرعو وعمروا شو حدا مانعكون؟ كل المشاريع هيك عبتصير تبرعات من الناس بعمار الموقف هيك صار والخلوه اسا عبيكبروها الناس عبتتبرع اتفضل شرف ولا بس تنظير؟
      هلي صار بالحديقه وغير الحديقه بينشرح بكلمتين :
      ولاد واهل فلتانين وناس تفكير ومستوى من مستوى ****
      لان الاحداث ممنهجه ومش منفرده هاذا بيدل على قسم منيح من جيل كامل بنفس المستوى الرفيع- ****.

      • المرسل:  &&&

        يلي خرّب بيعمر ..كوم مره بدها تتبرعلكون الناس . بعدين المبنى محلو معروف من خمسين سنه لازم كنتو تفتشوا على ارض ثاني تعملو فيها حديقه مش تهدموا مبنى وتعملوا محلو حديقه .واذا انزعجت حضرتك من ذكر المستشفى , بدك تتحملنا شوي لانو ما رح ننسى الموضوع والجاي اكثر بكثير من اللي راح .

  • المرسل:  حلوه يا بلدي

    لا تعليق يليق بمن تسول له نفسه ان يمس او يعتدي على حقوق الاخرين الخاصه والعامه … وهم نسبه معينه في كل مجتمع لا بد منها والمطلوب منا كأهل ان نحسن التربيه ونهتم باولادنا فهم كزهور الحديقه يحتاجون الرعايه والحمايه من العطش المرض والنباتات الضاره … لينعم مجتمعنا بجمال الروح والمظهر

  • المرسل:  عنان

    الناس هما تخرب بلدها

    x
  • x
  • x
    جميع الحقوق محفوظة لموقع " جولاني". يمنع إستخدام اي مادة من مواد الموقع دون اذن خطي من إدارة الموقع
      لافضل تصفح للموقع يرجي استعمال Chrome او Firefox او Internet explorer 9 او احدث



    عرض نسخة المحمول