مادة للتفكير.. عن مواد التنحيف والتجميل المنتشرة مؤخراً في منطقتنا

» شفاء شمس، روز عويدات، سالينا أبو صالح، رولان إبراهيم، مسيرة خاطر - 11/12/2016

z

مادة للتفكير..

أخر فتره كثير ع مننسأل ك اخصائيات تغذيه شو رأينا بكل أنواع البودرة (שיקיים) وأدوية تنزيل الوزن يللي عبيحاولوا يسوقوها  من خلال وسائل الاتصال وبالمحلات بشكل عام بالبلد. لهيك قررنا كل اخصائيات التغذية يللي بالجولان نكتب مقال نشرح فيه عن رأينا بالموضوع.

طبعا مع احترامنا لكل الأشخاص يلي عبيسوقوا هيذي المنتجات. ما تاخذوا المقال بشكل شخصي بس نحنا كمان كمختصين بعلوم التغذية العلاجية (يلي هو موضوع بدو 4 سنين تعليم وبدو شهادة جامعية مرخصة من وزارة الصحة) مسؤوليتنا كبيره كثير اتجاه صحة كل شخص بهضبة الجولان وواجبنا انو نبين الحقائق.

نحنا كأخصائيات تغذيه منحب نقلكن ركزوا عالصحه ثم الصحه ثم الصحة.. لانو لما تكون صحتنا من جوا منيجه ها الشي بيبن على جسمنا وشكلنا الخارجي.. والصحه بتجي من الأكل الصحي  ومش من البودره.. لو البودره هي الصحية كانت كل الناس بالعالم عاشت عالبوردة ومش عالأكل.. قد ميكتبوا على كيس البوردة انو مركب من أشياء صحية.. كل شي معبى بأكياس فيه مواد حافظة ليقدر يصمد معكن حتى لو لمدة أسبوع هذا أولا.. وشو مخاطر المواد الحافظه؟؟ فيكن تفوتوا تقروا بجوجل لانو بدها مقاله لحالها.. ثانيا اسهل طريقة للاقناع اليوم يقولوانا نعمل أبحاث على هذا المنتج والنتائج كانت رائعة. مش كل الأبحاث يللي منقراها هيي صحيحة.. مرات الشركات يلي بدها تسوق هالمنتج بتدفع مصاري “رشوه” عشان ينشرولهن نتائج ابحاثهن عشان يقنعوا الناس ويطالعوا مصاري من هالمنتجات. ومهم كثير نعرف شو نوع البحث يلي نعمل ومين الممول تبع البحث.. لانو مرات شركة المنتج نفسها هيي بتمول البحث وبتنشروا..

تعو نحكي شوي عن سلبيات المنتجات التجارية :

1.     المنتجات التجارية لتنزيل الوزن ممكن تسبب اكتئاب، انقطاع بالدورة الشهرية عند الصبايا, تساقط الشعر , اكتساب وزن بشكل سريع ومضاعف بعد منقطع هالمنتج,  اذى غير عكسي للكبد أو الكلى. مثلا في منتجات بتحتوي على كميات صوديوم وكفايين عالية لهيك ممكن اذا انسان بيعاني من ضغط الدم العالي وبياخذ هذا المنتج يضرب الكلى تبعو وهو مش عارف، وحتى الانسان العادي يللي ما بيعاني من أي مرض ممكن تضربلوا الكلى.

عمنواجه كثير حالات من هالنوع بعيادتنا الخاصة ..وفي ناس ما بيبين عندها الضرر بالمدى القصير وبتبدا تبين الاعراض الجانبية على المدى الطويل.

2.     ال ( ממרצים و שורפי שומן ) كثار منكون عبيسالوا عنهون وبياخذوهون. هذه المنتجات في قسم منها كبير مش مرخص من قبل وزارة الصحة، بالإضافة بتحتوي على مواد يلي بيشتغلوا على الجهاز العصبي المركزي ومع الوقت بيسببوا لاضطرابات نفسيه , اضرار وتعطيل عمل الأعضاء الداخلية متل الكلى والكبد والجهاز الهضمي و البنكرياس, مشاكل تنفس, اضطرابات بالنوم, اضطرابات بالهرمونات, ضغط دم مرتفع, جلطات قلب وجلطات دماغية, غياب عن الوعي.

لهيك هن مش الحل السحري لتزيل الوزن ولاعطائنا طاقة بالتدريب. فيكون تاخذوا الطاقة هذي وتنزلوا الوزن عن طريقة الاكل وانتوا مش بحاجة لتغرضوا حياتكون وجسمكون للخطر ولاضرار فش رجعه فيها.

3.     لكل يلي مفكرين انو الشييك يللي عبيحضروه اليوم من أي نوع بودرة بيساعدهن ينزلوا بالوزن, نتبهوا لانو هيذي البودرة بتحتوي على سعرات حرارية , نشويات, بورتينات ودهون يعني متلها متل أي وجبة. واذا ما نتبهنا لكمية السعرات الحرارية يلي عبتفوت كل اليوم ع جسمنا وما عرفنا نقسم أكلنا بطريقة صحيحة وننتبه للكميات كل اليوم ممكن نطلع بالوزن!!  بس هن  كيف بيقنعونا فيها؟؟  سريعة التحضير وبساعدكن تظلوا شبعانين لمدة طويلة ..بس بالمقابل فيك تحط بخلاط أي نوع فاكهه أو خضار بدك هو مع أي نوع مكسرات مع أي نوع برويتن متل أي نوع حليب وبدون متضيف نوع البورده تأخذ كل المكملات الغذائية يلي جسمك بحاجة لالها وتضلك شبعان مدة طويلة وما تنسوا قديش بتوفروا على جيبتك مبالغ كبيرة.

4.     فكروا بالمبالغ يللي عبتحطوها على أنواع هالمستحضرات.. قديش فيكن تصمدوا انكن تدفعوا هالمبالغ!! وحسب رأيكن هالمبالغ لمين عبتدفعوها ؟؟ هيذي الشركات بتشتغل بطريقة الشبكة .. صديق بجيب صديق .. بس كونوا حذرين ما تكونوا ضحايا لهالشبكات وتخلوهون يربحوا ع حساب صحتكن مصاري..

وبتتوقعوا انو فينا نستمر كل حياتنا متعلقين بهالشي؟؟  يعني مثال: الطفل الصغير بسن معين منبطل نعطية رضاعة حليب ( بودرة) ومنصير نعطيه ياكل أكل لانو الأكل هو مصدر الحياة وجزء من متعتنا بالحياة وما بصير كل الوقت يضلوا عالبدورة.

5.     لكل الأشخاص النباتيين أو الخضريين يللي بيعتمدوا على هذه المنتجات.. أول شي منحب نقكلن نحنا مش ضد انك تكون نباتي أو خضري بالعكس تمام بس مهطم ننتبه لكم نقطه: أولا هل هذه المنتجات عيتزودني بكل العناصر الغذئاية متل ال B12 والحديد بكميات كافية ؟؟

ثانيا: حلو كثير انكن بتفضلوا المنتجات العضوية ” אורגנית ”  بس اذا بدنا منقدر ناكل خضار فواكه عضوية وبالذات ببلادنا .. اسهل شي نلاقي بندورة وملفوف وباذنجان أو فواكه عضوية وبدون ميكلفنا كثير مصاري  ونعتمد على حبوب خضار وفواكه .. لانو هل انتوا متأكدين انو الحبة يلي فيها خضار وفواكة هيي عنجد بتوفرلكن كمية الالياف ومضادات الاكسدة يلي جسمكن بحاجة لالها؟؟ حسب الأبحاث العلمية كمية مضادات الاكسدة الموجودة بهذه لحبة منقدر ناخذها من 30 غرام من وجية فواكه ( وجبة الفواكة ممكن توصل ل 80 غرام) يعني: نصف حبة دراق بتعطيكن كمية مضادات الاكسدة الموجود بهالحبة .

6.     البروتين او ال חלבון في كثير شباب بيتدربوا وبياخذوا بروتينن,  حلو انو الانسان يكون عبيسوي شي لذاتو بس كمان من جهة ثانية يشتغل بالطريقة الصحيحة, مش غلط الانسان ياخذ بروتين بس تناول كمية اكثر من اللازم لجسمنا وبدون مراقبة ممكن تؤدي لضغط عالكلى ولمشاكل واضطرابات بوظيفتها عالمدى البعيد خاصة اذا مش بالسن المناسب, مهم نسوي حسابات لكمية البروتين يلي عمناخذها من الاكل وممكن تكون كافية ونحنا مش بحاجة لزياده ويمكن تكون بدك زياده وتاخذهون من اكل في بروتين وممكن تضطر تاخذ بودره فيها بروتين بس مش دغري منبلش بالبودرة وفي مختصين بهذا المجال بيقدروا يساعدوكون عالحسابات , وفي نظام غذائي خاص للرياضيين, لهيك قرار أخذ البروتين بيتعلق ببرنامج التدريب والأكل.

كلنا اليوم ك صبايا وشباب منحب الأناقة والجمال .. ومنطمح يكون عنا جسم صحي وحلو,عشان ما يكون في تعميم..أغلب البنات اليوم بيفضلوا قديش فييهن يصغروا بالحجم ويقطعوا عضلات البطن وأغلب الشباب بيفضلوا يكبروا بالحجم ويبنوا عضلاتهن..نحنا مع الجمال ونحنا مع كل انسان يعمل شو بيحب ويكون مرتاح مع جسموا.. بس في كم نقطه جدا مهم نلفتلكن نظركن لالهن:

أولا : كلنا كائنات بشرية والبشر بالعاده بيحبوا ينتموا للمجموعة يللي هن عايشين فييها وما بيفضلوا يغردوا برات السرب لانو الأغلب بيخاف من الاختلاف.. فهون مهم نسأل حالنا هل نحنا لازم نكون نسخ؟؟ وكلنا منشبة بعض من ناحية شكل الجسم ؟؟ وليش كلنا أخر فترة مركزين بس عشكل جسمنا؟؟ هل شكل جسمي هو يلي بيضفلي انوثة أو رجولة لشخصيتي؟

ثانيا : تعوا شو هو الجمال؟؟ ومن هو الرجل الجميل أو المرأه الجميله.. أكيد كل انسان عندوا مقاييس خاصة لجمال الشكل .. بس هون لازم ننتبه ونفتح عيونا وما نوقع بفخ مقاييس جمال المجتمع يللي بيفرضها علينا بدون ما نشعر.. يعني مثال قبل 50 سنه كانت المرأة الجميلة مارلين مونروا مع انها كان عندها ” كرش ” بمصطلحات اليوم..بس كانت من أجمل نساء العالم ولهيك كانت المرأه الجميلة بالمجتمع تعتبر المرأه الملانه أو يللي عندها بطن.. بينما اليوم منشوف بكل الأعلانات وبكل البرامج وبكل محل نساء مع بطن ملزق بالظهر ورجال مع عضلات كبار… فطبيعي تتغير نظرتنا للجمال..نحنا منقدر نفهمكن بالذات الصبايا والشباب يللي بجيل المراهقة.. هذا الضغط يللي عمنعيشوا كل يوم مش سهل على البالغين فطبيعي يكون مش سهل عليكن كمان.. وشو الصح وشو الغلط !! الخيار لالكن بس ما تسمحوا لحدا يضحك عليكن لأنو صحتنا ما ألها قطع غيار..ونتبهوا عطول لمصادر المعلومات يللي عبتتلقوها..هل هيي من موقع طبي وموثوق فيه؟؟ أو من شخص مؤهل ومختص!!

مادة للتفكير !!! ؟؟؟؟

بقلم :

شفاء شمس – لقب اول في علوم التغذية

روز عويدات – لقب ثاني في علوم التغذية + اخصائية بتغذية الحوامل

سالينا أبو صالح – لقب اول في علوم التغذية + أخصائية بتغذية الرياضيين

رولان إبراهيم – لقب اول في علوم التغذية + اخصائية بتغذية الحوامل

مسيرة خاطر – لقب اول في علوم التغذية + اخصائية بتغذية مرضى السكر

  • المرسل:  يارا

    حابي اسال عن تجميد الدهون يلي دارجي كمان عنا؟

  • المرسل:  عبير

    يسعد ربكن
    من زمان عبستنا حدا منكن يحكي شي يوعّي البنات من الانجراف ورا الشيكيم وصرعته

  • المرسل:  جولانيه. ..

    موضوع حلو كثير ولحكي 100 %بخصوص الادويي ولحبوب لتخفيف الوزن .وإني برأيي حلو الانسان يحافظ على وزنو بس في 100 طريقة غير الادويي.
    وعشان جمال الاصل جمال روح .بس ليوم عنا مجتمع للأسف بيهمو شكل وللوزن

  • المرسل:  اياد مداح

    شكرا لوعيكم الاجتماعي وغيرتكون على المصلحة العامة. هذه التكتلات هي التكتلات المفيدة.

  • المرسل:  شكرا كثير عالاهتمام

    حلو كثير..عفكرة اني جربت اخذ من الشيك بس حسيت حالي بديت اطلع بالوزن وفتحت قابليتي للاكل فدغري تركتو

  • المرسل:  منى

    كلام صحيح وكلام مقنع …نظام الغذاء هو اهم اشي اما نحنا كمجتمع منركض عللادويه وعلامور الخطره لان كل هالمعطيات ممكن تضرنا مو تنفعنا …ترتيب غذائنا هو اهم نقطه وبهك منحافظ عا اجسامنا …شكرا للمختصين لفتولننا نظرنا على هالامر …لكل شي الو سيئات وحتى تصغير المعده لها سيئاتها ..

  • المرسل:  نورا الصفدي

    كلام صحيح ميه بالميه وبوجود صبايا مثلكن متعملي ومثقفي واخصائيه بهيك شي ليش لنعرض اجسامنا لمواد سامه ومضره يعطيكن الف عافي صبايا وللأمام دائما

  • المرسل:  روزين

    صباح الخير
    الموضوع قييم واجى بمحلو.
    مع صبايا متعلمين ومثقفين مثلكن ،نحنى بنضل
    نكتسب وعي وفهم ليزيد ويخلق مجتمعنا واعي ويدرك لكل الأمور هلي عمتصير حوالي.
    بالآونه الاخيره عمتكثر هاي منتجات وعمتجذب نسبه كثيره من مجتمع ، لعدم الوعي لهاي الأمور هلي عمزيد الأمراض ومشاكل الصحيه .
    كل الاحترام صبايا وانشالله بتضلكن بهالعطاء ليوعى المجتمع ونساعدو ليصير قدر الإمكان خالي من شوائب.

  • المرسل:  الجولان

    مساء الخير للجميع كثير حلوي لفته هالنظر منكن صبايا وهذا ان دل دل على اهتمامكن بواجبكن وغيرتكن على مجتمعكن بنتامل يظل عطول ارشاد منكن وتوعيه الى الامام احلى صبايا فيكن بنكبر وفيكن بنفتخر وشكرا

  • المرسل:  مهتم باضافات التغذيه

    اول شي يعطيكن العافي على تعليمكن وجهودكن, بس عندي ملاحظات عالموضوع:

    1- فكره وجبات البودرة بلشت كبديل لحليب الام وبعدين تطورت لوجبات سريعه ومغذيه وقليله السعرات الحراريه للكبار, فبما انو 99% من الاطفال عمنزودها بفتره معينه بحليب البودرة وموافق من قبل وزاره الصحه فبتوقعش في خطر عالكبار بالعكس .
    2-من ناحيه الرشوه وزاره الصحه الامريكيه رتشت بسنوات ال60 عن مخاطر السكر والنشويات وعلاقتو بامراض القلب والشي اعترفو في وزاره الصحه بسنه 2016 وطبعا اغلب التعليم التغذيه بالعالم مبني على ابحاث وزاره الصحه الامريكيه, قسم من شركات التغذيه البودرة من سنوات ال80 بيحكو عن الموضوع وبيتعاملو حسبو بالمنتجات يلي بسوقوها هذا الرابط ” http://www.haaretz.co.il/news/world/america/.premium-1.3066820
    .
    3- كثير من المعارف تبعي كانو عند قسم منكن بجلسات فكان من الشغلات المهمه الموجوده بكثره بالبرامج تبعهن مثل: الرز الابيض كلو نشويات بسيطه, القش كلو نشويات وملح كثير, بسكوت الروجيم كلو نشويات وسكر …..
    4- طريقه الشبكه صديق بجيب صديق .. من افضل طرق التسويق هذا بدل على جودة المنتج وفوائدو غير هيك مكنتش بتنجح الشبكه .. ومن ناحيه تجاريه وربح كل مهنه احد اهدافها الربح المادي.
    5- النتائج يلي اثبتها قسم كبير من المنتجات من نواحي صحيه وترك ناس الادويه والعلاج عن طريق الاكل الصحي يلي هو بودره ملانه مواد بحاجه الها الجسم , مش سهل يحصل عليها الجسم من الاكل العادي وخاصه انو اغلب الاكل اليوم مصنع وكلو مواد حافظه وملان سكر وملح لزيادة رغبه الاكل .
    6- طبعا زياده اخذ البروتين بكمات كبيري الو تاثيرات سلبيه للجسم, هذا من مسؤوليه نوادي الرياضه يوعو الشباب ومنتجات اضافه التغذيه مفيهاش كمات زياده من البروتين بالوجبات, وكل شركه بتطلب من المتعاملين معها تعلم الزبائن بعد اخذ كميات زياده عن المسموح.
    7- الاضافات الغذائيه البودرة مش بالضروره مواد تنحيف هي وجبات غنيه بالفيتامينات والمعادن والبروتين يلي بحاجه الها الجسم وقليله السعرات الحراريه فهذا الشي بخلي الاشخاص يضعفو او مينصحوش .
    في كثير بعد ملاحظات وامثله ….

  • المرسل:  طليع محمد محمود

    كل الاحترام الكن صبايا عهلمقال يلي كتبتو بللغه بسيطه ومفهومه النا ولمجتمعنا
    لانو الحكي كثير واقعي ومنطقي

    واكيد كثار رح بستفيدو من هالمعلومات

    بالتوفيق الكن

    x
  • x
  • x
    جميع الحقوق محفوظة لموقع " جولاني". يمنع إستخدام اي مادة من مواد الموقع دون اذن خطي من إدارة الموقع
      لافضل تصفح للموقع يرجي استعمال Chrome او Firefox او Internet explorer 9 او احدث



    عرض نسخة المحمول