من شو بتشكي السيارة الصغيرة؟

» لبيبة * - 09/06/2014

 

أكيد كلنا شايفين أزمة السير بالبلد وعم نعاني منها، واللي مبين انو المشكلة كرمالها عم تتأزم أكثر وأكثر وما في أي بريق أمل أنو تنحل عن قريب.

برأيي أسباب المشكلة متعددة لكن في سببين أساسيين: الأول هو ضيق الطرقات اللي ما بتوسع هذا الكم الكبير من السيارات اللي موجودة بالبلد، والثاني هو سبب تربوي ثقافي.. يعني نحنا جماعة فوضوية والفوضة وعدم النظام تبعنا عم بيزيدو مشكلة ضيق الشوارع تعقيد.. لأ، حتى انو سلوكنا الفوضوي يمكن يكون السبب الأساسي بمشلكة زحمة السير اللي عم نشوفها كل يوم العصر والمسا، وخاصة بنهاية الأسبوع.

بعد تفكير طويل عن طريقة لحل هالمشكلة انتبهت لشي ممكن يساهم بطريقة أو بأخرى بالتخفيف منها..

أكيد الكل ملاحظين أنو في هوس عنا بالسيارات الكبيرة.. يعني ما حدا بدو يركب إلا جيب أو مرسيدس، أو أي سيارة كبيرة وضخمة.. مهم كثير تكون السيارة كبيرة وضخمة.. “لأنو كل مكبرت سيارة الانسان بيكبر قدره”…

بكل العالم.. بداخل المدينة الناس العاديين بيشتروا سيارة صغيرة (ميني).. لعدة أسباب:

السبب الأول أنو السيارة صغيرة وأسهلها تمشي بالطرقات الضيقة وبزحمة السير.. وبسهولة منقدر نلاقي محل نوقفها فيه…

السبب الثاني انه مصروفها قليل.. بنزين أقل.. تأمين أقل.. وسعرها أقل وأقل…

السبب الثالث انها ما بتلوث البيئة.. وانبعاثات الغاز منها قليلة ولا تقارن مع السيارات الكبيرة.. يعني منصير نتنشق نحنا وولادنا هوا نقي.

لكن.. وعلى ما يبدو اننا ما وصلنا لهيك مستوى من الوعي.. يعني مجتمعنا بعده متخلف وما وصل لهيك مرحلة من الرقي انه يتخلى عن القشور.. ويفكر بعقل..

العالم المتحضر اليوم عم يتخلى حتى عن السيارة.. وبكثير مدن صاروا عم يركبوا بسكليت للتنقل.. ومش شايفينها عيب.. تصوروا عنا واحد أو وحدة يركبوا بسكليت!! ولا غير يتشرشحو بالبلد ويصيروا على كل لسان…

السيارة الصغيرة ثمنها بين 50 لـ 60 ألف شيكل.. يعني بيقدر الواحد يشتريها من الوكالة بالتقسيط المريح ويدفع 1000 شيكل بالشهر.. مبلغ كل واحد بيقدر يأمنوا، وما في حاجة ننزنق ونشتري سيارة بـ 150 أو 200 ألف شيكل.. ونفوت بديون وأزمات مالية.. منشان شو.. منشان نتفشخر انو راكبين جيب ولو عالخازوق…

يمكن نطلب من الناس انو يركبوا بسكليت صعبة.. لان طبوغرافيا البلد مش مساعدي وفيها طلعات ونزلات.. بس فينا نطلب منهن يشتروا سيارة صغيرة.. وخاصة الناس اللي عادة ما بيطلعوا برات البلد.. وهن اكثرية.. يعني بستعملوا السيارة لقضاء حاجتهم بالبلد.. وسيارة صغيرة بتقضي الحاجة وبتساهم بحل مشكلة زحمة السير..

فكرة.. تعالو نجربها…

_______________________

* لبيبة: اسم مستعار. الاسم الحقيقي محفوظ لدى الموقع.

  • المرسل:  مش مهم

    *** مش حكي منطقي بالمره مش انتي بتجبري الناس كيف تعيش حياتها بتركب جيب بتركب طياره بتركب حمار كل واحد حر ثانيا من قلك انو الجيب مصروفو كبير او تامينو متلو متل السيارات العاديه مش السيارات الفخمه يلي من 60 وفوق وفي سيارات اليوم ب40 الف بس تامينها اكبر والفوضى من يلي عبسوق نفسو لمنو الشباب بتضلل ساعه موقفه بنص طريق يلي عبيحكي مع يلي قبالو واذا حدا زمرلوبصير يجاكر مجاكره انو طريق يلي خلفو او الناس يلي ماجري محلاتها بدل ميكون منهن كراج ليحلو ازمه بقومو باجرو كل كراجاتهن ليصفو عجنب الطريق واكثر المشاكل هي الناس يلي من برات البلد بضلهن ملزقين بالاحرى بضلهن من الدوار للدوار وهيك طيب انتو عبتحشكو في ناس عبتقضي مشوار مش مجبوره منشان تحشكو يستنو ساعه والحل الاكثر وين عبصير عركات يصير طريق مشتليفت مش زفت يلي ورا سياره بتفوت كلو بيقضي مشوارو مشي

    • المرسل:  لا حورا ولا عورا

      والله يا سيد مش مهم اني لو محلك بقول مهم ونص لانو كلامك واقعي جدا وما في ولا اي عيب منشان هيك انت مهم ومهم كثير كمان …

  • المرسل:  مهتم

    بس فكنش تجبرو نيس شو تشتري وكل ويحد حر بحيلو نشلله بركيب طياره شو الكون علاقه ولمشكلي مش بل سياره لمشكلي بل بلد وبطرقانا ما شلله وكين بعد ناقص تقررو شو سياره يلي ليزم نركبا

  • المرسل:  حارة الخلوة

    الحقيقة اني عندي سيارة صغيري وابدلهيش لا بجيب ولا بمرسيدس لانها مكفيتني وزيادي…وفي كمان حل ..انو نجيب مواتير صغيري هلي بيتعبو عالكهربا عرفتوهن؟

  • المرسل:  منال

    حكياتك كثير حلوين بس تفكريش تحلي الازمي اذا كل البلد اشترت فيات وابيزا واني عارفي شو بعد
    ومش كل من ركب جيب عبيتفشخر بالعكس حارات المجدل بدها جياب وخصوصي الثلج…
    والسياره الخفيفي لمعلوماتك ستام خبطه بتتجعلك هي واللي جواتها اما اذا كانت ثقيلي ممكن تحمي صاحبها واكيد الحامي الله تعالى….
    مع احترامي لموقع جوﻻني اللي قام بالنشر برايكن ها الحل ؟؟؟،
    اسا بسمع انو الجيب او المرسيدس او الشفرليت او الفيات انو كل نوع الها حنبون خاص يعني شي بضحك بس تصف بحنيون نفس المساحه مقسم وعبيسع كل انواع السيارات …
    واسفااااااه

  • المرسل:  ss

    في حل احسن وهو انو الناس تتعود عال קטנועים دراجات ناريه صغيره وهي الطريقه المتبعه بكل مدن العالم سعرو تقريبا ببلاش فش حاجه لقرض ولا شي ب 5000 شيكل بتجيب واحد محترم وبياخذش محل بالمره ومصروفو قليل جدا جدا وفيك تمشي في حتى لمسافات طويله خارج المنطقه … بس عنا الناس راسها مركب غير وبتخاف من كل شي جديد مع انو هي الشغلي بتحل 60% من المشكله ومنوفر عحالنا كثير وقت ووجع راس ومصاري

    • المرسل:  ...

      اي بتتخايل زلمي شيخ. مقعد مرتو ورا وعبيتنقلو بالافنوع ! او زلمي عمرو 50 سني ههه حل مش مزبوط وبعدنا قروييين لما نتمدن منعمل بفكرتك .. ممكن تزبط بس لعمر معين

      • المرسل:  ربيع

        يا رجل يعني اذا نصحت هالمخلوقه الناس تشتري سياره صغيري مش معناتو انو كل واحد لازم غصبنعنو يشتريها يعني يمكن في ناس ضروفهن بتجبر يكون عندهن سياره كبيره متل العيل الكبيره او الاختياريي مثلا بس بيضل في هنيك كثير ناس يمكن 50 % بتناسبهن السياره الصغيري والحكي موجه لهوذ الناس واني بايد لبيبه انو لو هوذ الناس كانت سياراتن صغيري كان بيخفف من زحمت السير اكيد

  • المرسل:  ربيع

    يا لبيبة من التعليقات بتفهمي شو هو مستوى الناس عنا ويبدو المعلقين الي عبينتقدو ما فهمو شي من المكتوب وكانك عبتجبريهن يشترو سيارات على كيفيك خليهون بالفوضى لحتى ***** شو بدك بوجع هالراس اني منزمان فقدت الامل انو هالمجتمع يتصلح خلي فخار يكسر بعضو

  • المرسل:  اسالو لبيبه

    اخت لبيبه بتحكي عن القشور ولب موضوعك هو قشور وحكيتي عن الوعي وما عرفتي تفكري بوعي متاسف موضوعك بس عنوانو منطقي لانو تبحري وتعمقي بالوضع اكثر بتقدري توصاي لاسباب مقنعه وهي بتتلخص بكلمه وحده (الضغط). مش ملاحظين الضغط هللي عايشو المجتمع من كل النواحي ؟ واهمها سبب وجود عدد سيارات بالباد نسبيا مش كبير وملائم مع التعداد البشري . ما فكرتي انو كل مساحة 200 م.م كوم انسان عايشين فيها طبعا القصد مساحه بدون عدد طوابق . ما فكرتي الطرقان هللي عددها هائل اسم الله دخول من اتجاه واحد بدون خروج من الجنب الثاني اسم الله كل حاره 10 طرقان بفوتو وبيطلعو منها . مفكرتيش المساحه للخارطه الهيكليه هللي محاصره البشر بدون توسع وهي اكبر مشكله ؟ موضوعك حلو النقاش فيه بشكل موسع اقل مفيها لنفش الضغط هللي فينا بالحكي ويا ريت بيكبر ليوصل لكل انسان ونفكر بالحلول على مستوى اعلى لانو بكوم جمله ما بيخلص .

  • المرسل:  شرق وغرب

    والله يا لبيبه الظاهر انو انتي بتحكي من الشرق وغيرك برد من الغرب وحلوه الفكره

  • المرسل:  مواطنة

    المشكل انو عنا الناس ما بتمد أجريها على قد بساطها على طول بتحب تتباهى ويا ريت بشو بسيارة مش بفهموا وبعقلوا وبشهادتوا بشوفوا حالهن على شغلات فاضيي يعني اذا ركبوا جيب بفكروا حالهن الناس معبرتهن وهن بكونوا ريحة بيتهن طالعة يعني من وين ما درتي مش راح تنحل المشكلة يلي طرحتيها ابدا لان حمد الله الوسخ والفساد معشش بالعقول .

  • المرسل:  مغترب

    انا مغترب أعيش خارج البلاد منذ عشرين عاما عندما أزور الأهل في الجولان اولاحظ بشكل كبير الفوضى في حركة السير وهذا يذكرني بالأحياء الشعبية الفقيره خارج البلاد لا علاقه لحجم السيارات او نوعها بالفوضى إنما هو أدب القيادة النظام والترتيب احترام الاخر . الأهل في الجولان يعيشون تحت ضغط الحياة أليوميه مما أدى الى الفوضى والتخلي عن الأشياء الاساسيه لحياة الفرد الآداب واحترام الاخر

  • المرسل:  أبو أيهم

    أرى الفكرة معقولة جدا وتدل على بعد نظر الكاتبة لبيبة , لكن وللاسف الشديد يبدو ان البعض لم يرق بعد لمستوى ان يفهم ما جاء بهذه الخاطرة .
    اقول للبيبة يبدو انك من زمن اخر سبق ذلك الذي يعيشه المعقبين على خاطرتك , فهناك مراحل تاريخية على الشعوب ان تمر بها اولا . وعلينا الانتظار . لننتظر ونرى …

    • المرسل:  أيهم بذات نفسه

      لقد مللنا الانتظار يا أبتي. وأنه من غير الممكن أن يصل مجتمعنا لنقطة فهم الرأي الآخر وتقبله وأعطاء الرأي بالمقال ككل بل سيبقى ينتقد النقاط الصغيرة ويلغي مشاريع كبيرة من أجل نقطة صغيرة لم تعجب القارئ.
      أحبك :)

  • المرسل:  ...

    بس السيارات الصغيره مش مع كل العيل بتزبط لان في عندك عيل بتتعدى ال 5 افراد وهن بحاجي لشي كبير يوسعهن ليتنقلو سوا… حل غير مناسب وغير اساسي

  • المرسل:  مهتم

    معك حق ١٠٠٪ ، اما الناس بهمها المنفخة فقط واني بقول ها انسب وافضل حل وشكرا

  • المرسل:  مشكله

    المشكله مشكله تربويه اخلاقيه ..والموضوع من اساسو بدوش 2 يحكو فيه … الشباب الي مكيفه عبتحشك رايحه جاي ..بما انكن اعزائي
    شايفين انو ها الطريق((( بطل يوسع سيارات ليش مصرين تضلكن ماشيين من الدوار للدوار ))) وتوقفو حركه السير وتفتحو حديث ونقاشات وتصرفو بنزين وتحرقو ماطور السيارا …
    طيب مانتو شايفين انو في عركه عملو لفه كبيره احلا .. او تفضلو نزلو تمشو .. ارخص واحلا .. واهون .. الموضوع انو مش بس انتو عالطريق في اصحاب مصالح بدها تسترزق .. وفي ناس عندها اشغال ..
    ما دخلش حجم السياره ابدا . وها راي وذوق ..ومش طريق الي خف حدا .. ها طريق رئيسي ومدخل بلد

  • المرسل:  انسانه من هالبلد

    المشكله ليست بحجم السيارات أو أعدادها وإنما بسكان القريه أنفسهم لأن نسبه قليله من السائقين تقود سياراتهم حسب آداب السير وبأخلاق عالية..فنحن مع الأسف مجتمع فوضوي للغايه ..

  • المرسل:  حسان

    يمكن ابو ايهم سابق الناس بكوم عصر عيب هلحكي وهذا حكي *** وناس متفضيي كل انسان فكر بسياره صغيره بس عنا ما بتنفعش كل واحد يركب هلي بيعجبو

  • المرسل:  جولانية

    هههههه اهم شي انو صرنا نتدخل ببعض لدرجة انو نقترح او نفرض غظعالنتس شو بدا تشتري وعشو بدا تصرف مصاريها!!

    • المرسل:  لبيبة

      يا جولانية.. ما حدا عم يفرض على حدا شي.. القضية مجرد فكرة خطرت على بالي وحبيت شارك الناس فيها.. مجرد اقتراح ممكن يعجب وممكن لأ.. أو بتقدري تسميه تفكير بصوت عالي ومش أكثر من هيك.. لكن يبدو انا ما منتحمل حتى نسمع فكرة من الغير.. وهون بيت القصيد..

  • المرسل:  مديح

    كل الشباب عندها سيرات صغيره وهن اصل الازمه اما هلي عندو جيب ومارسيدس بخاف يطلع بلعركي بيضربو او بيوسعوش اني بدي اشتري بوبكات احلا شي بلف بارضو واذا مستعجل بقلب سيرات

  • المرسل:  مجدل شمس

    المشكلي صارت بيوم الخميس والجمعه يعني كل انسان متفضي بيجي على المجدل وبيعبي 200 شيكل بنزين وبيجي بيحشك من دوار اسعد كنج لعند دوار عاطف لايخر السهره لازم نلاقي حل لهلشغلي هي اول شي ومنرجع لموضوعك يا اخت لبيبه ….ولموضوع يلي انتي كاتبتي من اهم لمواضيع يلي لازم تتناقش

  • المرسل:  وجدي عفيف

    السواقه آداب ، مش مشكلي حجم او نوع السيارة ، المشكله في أنا وفي أدابي في الطريق ، واعتبار الآخرين

  • المرسل:  أسعد

    لم أفاجأ بالتعقيبات الواردة على هذه المقالة لأنني أعرف منذ زمن أن الغالبية في مجتمعنا تعاني من مشكلة كبيرة في فهم المقروء . والله أن بعض التعقيبات تظهر وكأن كاتبها لم يقرأ المقالة بتاتاً .

  • المرسل:  نادر فخر الدين

    اني عندي سياره فيات بونتو خفيفه نظيفي وحجما صغير بنصح كل الناس تجيب مننا او علقليلي جربوها ومش راح تندمو بتشوفو كيف بتهون عحالكن كثير شغلات بالحيات وخاصه عنا بلبلد هي المشكلي بدا حل فش مهرب …

  • المرسل:  مشرق مرعي

    بيكونو كوم صبيه عبيتمشو من الدوار للدوار وهن يلي بيعملو كل عركت السير.. بس المشكلي الكبيري مش بالصبايا منقدرش نحبسهون المشكلي بالعقول الفجعاني.ليش فش عركت سير عطريق دوار سلطان باشا.الجواب لانو فش صبايا عبتتمشى هونيك

  • المرسل:  لبانه

    يمكن ماري انطوانيت دخلكون اللي قام ضدها الشعب قام عبتسال الحارس تبعها لماذا يثور الشعب ؟؟ قام قلها الشعب مش ملاقي خبز لياكل قالتلو خليي ياكل بسكوت **واسا الاخت لبيبه **من شو بتشكي السياره الصغيره 50000 شيكل بس وخذهون قرض من البنك *****اعلانات للبنك هيذي ولا مزحه لانو نحنا السياره ام 10000 شيكل مش قادرين نشتريها لنشتري ام 50000 شيكل وبعدين لنفرض بلكي حدا عندو عيلي كبيري بصير هيك بدو سيارتين لانو الصغيري ما بتوسع الكل ===اقتراحك غير عملي يا اخت لبيبه

    x
  • x
  • x
    جميع الحقوق محفوظة لموقع " جولاني". يمنع إستخدام اي مادة من مواد الموقع دون اذن خطي من إدارة الموقع
      لافضل تصفح للموقع يرجي استعمال Chrome او Firefox او Internet explorer 9 او احدث



    عرض نسخة المحمول