اليوم صار معي بالشغل شي كثييير مهم، أعطاني أمل انو راح يكون عنا جيل مبدع ورائع، وحسيت انه لازم احكيه وحاول وصله للاهل بأي طريقه..
إجت لعندي أم عالعيادة الخاصة، وجايبي معها ابنها عشان تساعده يهتم بصحته.. الطفل بيجنن وبالنسبه لطوله وجيله عنده سمنة.
لما الأم بلشت تحكي عن الطفل، حكت كل الصفات الإيجابية الموجودة عنده.. قالت انه ولد فنان، بيحب يرسم، وعنده ثروة لغوية قوية.. بيحب ياكل خضار وفواكه.. بياكل صحي بالبيت وبيبتعد عن النقرشات.. دائماً بيفطر. بيمارس الرياضه.. باختصار الأم حاولت تدعم شخصية الولد قدر الامكان…
طبعا انا ابتهجت وطرت من فرحتي، لانه من تجربتي بالعمل، أغلب الامهات من خوفها وحنيتها ع ولادها، لما تبدا تحكي عنهم بتبدا بالسلبيات.. قديش بياكل نقاريش، وما بيرد عليها، ودائما بده كولا أو عصير…
طبعا أنا ما عبنتقدهن، لأنه بعرف قديش بحبو ولادهن وخايفين.. وبقدر افهمكن وحس فيكن لانه عنجد مش سهل الأم يكون عندها ولد مختلف عن كل رفقاته بالمدرسة، إن كان أنحف أو اسمن من الكل.. مش سهل تسمع كل يوم انتقادات من البيئة، متل: “يا اسم الله كثير هيك”، أو “انتبهيله قبارتي السمنة مرض العصر”، أو “اخذتي ع اخصائية تغذيه؟؟ كثير نصحان”.. وخذوا ع انتقادات بتحطم الولد والام سوا.. ومش سهل كمان إنه نحنا عايشين بمحل ملان وفره وإغراءات يلي نحنا الكبار مرات مش عمنقدر نقاومها، فتخيلوا الاطفال يلي بعد ما بيقدروا يتحكموا بغرائزهم!!!
لهيك يا حبيبات قلبي حبيت الفتلكن نظركن لكم شغله بيساعدوكن الكن كأهل والنا كمعالجات لنغير نمط الحياة ونوصل لنتائج افضل:
1. قبل ما نطلب من الولد يعمل رياضة ويقلل وقت عالتلفون، أو ياكل فطور، أو يشرب مي.. تعالو نسأل حالنا، هل نحنا بالاول عمنلتزم بالاشياء يلي عمنطلبها من ولادنا.. يعني عفواً منكن، بس ما بيصير مثلا الأم ما بتاكل خضرة وبدها ابنها بالقوة يحب الخضرة.
2. الطفل بحاجة لكمية سعرات حرارية أكثر بكثير من الكبير.. لهيك هو بحاجة ل 3-4 وجبات رئيسية و3 وجبات خفيفه باليوم.. يعني اذا أكل 7 وجبات باليوم هذا طبيعي جداً. وما تخافوا من وجبة العشاء.. لما الطفل يحس انو عنده 4 وجبات، بيشعر بالأمان، لانه ببطل يحس بالجوع.. وهيك بيبطل ياكل بالسر او يطلب نقاريش كثير.
3. مسموح الطفل ياكل نقروشه وحدة باليوم، لكن مهم نفهم الطفل انه لازم ياكلها بعد الاكل، لإنها ما بتساعدنا نكبر.. وحاولوا ما تقولوا ممنوع لانه كل ممنوع مرغوب.
4. الابحاث بتقول أنه أغلب الأطفال والمراهقين الي عندهم اظطرابات الاكل، متل انوركسيا وبوليميا، وكل الوقت بيحاولوا يتقيؤوا ليضعفوا.. أهاليهم بالبيت كانو كل الوقت يعملوا أو يحكوا عن الروجيم ويربطوا الجمال والنجاح بالنصاحة والضعف.
5. اذا الولد عمل فحوصات دم وكان كل شي عندو بالمعدل المطلوب.. ما في حاجه نخاف او نقلق من السمنة.. فينا نساعد الطفل يغير عاداته بدون ما نحسسوا انه هو ناصح او ضعيف!!
6.من أخطر الكلمات إللي بتساهم بتعقيد الطفل: “صحن واحد بيكفي”، أو “أف يا إمي بعدك ما شبعت”، أو “خلّص صحنك”، أو “يا إمي البس بياكل أكثر منهن”.
7. لما يكون في سمنة أو سوء تغذية، ممنوع منعا باتا نحكي عن الوزن.. ولازم نركز بس عالصحة والدعم المعنوي للطفل، ليشوف قديش عنده قدرات ويحس انه أجمل ولد بالعالم.
ملاحظه: نحنا كأخصائيات تغذية، مع الاطفال ممنوع نعطي نظام غذائي، ومنشتغل بس عتغيير عادات خاطئه من خلال أهداف صغيرة.
أعتذر طولت عليكن بالحكي..بس حسيت حالي فخورة كثير بهالأم، وبعرف انه كل الامهات بيحبو ولادهن، وعندهن القدرة يركزوا عالايجابيات باطفالهن، فبتمنى كون وصّلت الرسالة…
شكرا لكل حدا خلّص المقال للاخر.
فخورة بولاد بلدي القرّاء كمان…
_____________________________________
* روز عويدات: أخصائية تغذية
كثير حبيت اللي قريتو وجد في معلومات وحكي اللي عايشينو ومش حاسين بحالنا .. شكرا كثير الك وكل الاحترام
ونحنا منفتحر فيكي روز كل شكر وتقدير للمعلومات يلي عرفتينا علييها بلتوفيق لالك
مشكوره كثير مفيده هلمعلومات يا ريت لكل يتقيد فيها ونحنا منفتخر انو عندنا صبايا متلك
كل الاحترام عنجد ونعم الاخلاق دمتي نبراسا ينير الدروب
كثير حلو الكلام ذكرتيني بقصه صارت معي مع احدى المعلمات لما اتصلت فيي حتى تخبرني عن ابني اشياء ايجابيه واني اسمعها واستنى شو الشكوى بالاخر.. تفاجئت متلك لان تعودنا بس يتصلو فينا لما يكون في اشياء سلبيي ما بنسى دعمها. وانسانيتها يا ريت كلنا نتعود نبدا بالايجابيات اولا
كل الاحترام عنجد كل ام هيك بتحكي من محبتها لابنها ما بتحب حدا ينتقدو ام يطلع في انو هو سمين الله يخلي كل الامهات ولولاد بخير
بالعكس اخت روز انتي ما طولتي علينا بالحكي .انتي وصلتينا كثير اجوبه مهمه للمعامله مع اطفالنا . وارجو منك المثابره خلال هذا الموقع واطلاعنا بمقالات اخرى لنستفيد منك واتمنى بان رسالتك الجميله هذه وصلت للجميع .
كل الاحترام روز
في شغلة بدي استفسر عنها، اذا بشوف ابني اضعف من كل رفقاتو ومن جيلو ،ممنوع قلو خلص صحنك؟ او خليه ياكل اكثرر ؟؟
هلا بعمي اركان..
كل طفل بيخلق مع وزن وطول مناسبين لالو..مهم كثير ما نقارن الطفل بولاد صفو لانو كل ولد الو الجنات الوراثيه، نسبة الحرق والمقاييس اللي بتخصوا.. طبعا ممنوع الاهل يحسسوه انو هو اقل من ولاد جيلو او يفرضوا عليه يخلص صحنوا لانو هالشي بيعمل ردة فعل عند الطفل وبيخليه يجاكر ويبطل ياكل..
الاهل مهم بهيك حاله يراقبوا نمو الطفل ليشوفوا اذا عبيطول ويطلع بالوزن بالمعدل الملايم الو شخصيا ) ممكن تتم المراقبه عند الطبيب او اخصائية تغذيه(.
مهم جدا كمان ما يحطوا ماء او عصير مع الاكل ويعطوه يشرب بعد الاكل لانو الشرب مع الاكل بيخلي الولد يشبع من كميات قليله..
مرحبا روز كثير حلو اللي حكيتي بس اني بنتي لا بدها تروح عالرياضه ولا على اخصاءية تغذيه وكل ما احكي معها بتقلي طالعتلك ما انتي ناصحه عمرها 13 سنه وزنها 70 ك اذا عندك شي نصيحه كيف بقنعها اذا ممكن والك الشكر
هلا فيكي..
اول شي مهم ما عاد تسمع كلمة انها ناصحه..وما عاد يتوجهلها ملاحظات عشان وزنها وشكلها..دعميها وقليلها انها حلوه كيف م كانت تكون وبعدين مهم نفحص مع البنت ليش مش حابي تعمل رياضه؟؟ يمكن عبتقترحي عليها نوع رياضه يلي ما بتحبوا او بتكون محرجه بعمرها اذا بتعملوا..وممكن تختاروا نوع رياضه و انتي وهي تبدو تعملوا رياضه سوا وتقليلها معك حق اني لازم اهتم بصحتي كمان.. مهم كمان تشوفي شو بتعرف عن اخصائة التغذيه!! بالجيل هذا البنات ما بتحب حدا يعرف وزنها ويمكن هي حابي تنزل وزنها بس محرجي انو حدا غريب يشوفو.. واغلب الاطفال بيفكروا انو اخصائية التغذيه بتعمل روجيم..والروجيم بعيونهن حرمان وبهااجيل صعب عليهن يحرموا حالهن..
لهيك مهم نشرح للطفل انو اخصائية التغذيه بتساعدنا نهتم بصحتنا..واذا ما بدها ناخذ الوزن ما مناخذوا باللقاءات الاولى لتحس حالها مرتاحه..ومهم تعرف انو ما منعمل روجيم ومنبدا نعمل تغيير بعاداتها حسب قدرتها وما في حرمان من اي نوع اكل..
واذا بعد مشرحتيلها ما وافقت تركيها عراحتها..بس تحس حالها جاهزه تعمل تغيير هيي راح تقلك بدي تساعديني لاعمل تغيير..
إبنتي لديها نفس المشكله السمنه الزائده وهي تبلغ من العمر 12 عاما” تأكل بكميه مفرط بها ولا تسمع لنصيحتي خضعت لجميع الفحوصات وجميع النتائج جيده والحمدالله وعرضتها على خبيرة تغذيه ولكن كل محاولاتي بائت بالفشل بدايتها كانت حاله نفسيه نتيجة طلاقي من اباها وبعد ذالك اصبح الشئ عادي فرطها باﻻكل والأن اعرضها على إخصائيه نفسيه ماذا تنصحينني أن افعل ؟؟؟؟
هلا رولا..
اول شي كل الاحترام هالاهتمام وعرض الطفله ع اخصائيه تغذيه واخصائيه نفسيه.حتى ولو كانت تجربة فاشله مع اخصائية التغيه حلو انو جربت.ثاني شي حلو كثير انو فحوصات الطفله منيحه..هذا شي بيطمن..ممكن كثير الطفله صايبها ردة فعل وعبتفش خلقها بالاكل لانو مارقه بتجربه قاسيه..وهذا طبيعي..اهم شي ندعم نفسيتها عطول وتسمعيها حكي انها هي حلوه كيف هي وانو اذا بدها تروح ع اخصائية تغذيه بس عشان تهتم بصحتها وتركيها هي تختار الوقت اللي بتحس فيه انو بدها تعمل تغيير..
حكيلها انو شكل جسمها راح يتغير وكل سم بتطولوا بيعني انها نزلت كيلو..لهيك ما تهتم لوزنها لانو راح يتغير..
نشالله تنجح الطريقه..جربي مش خسرانين شي!!
غريب ماجملك وماجمل حكياتك
حبيبتي روز نشالله النجاح بكون حليفك وين مكنتي …
عفكرا الموضوع كثير حلو ولازم ينطرح كان
شكراً الك عهالموضوع صح ما عندي تجارب مع اطفال بس تعلمت منوو لقدام ملان شغلات
يصلحلك روزي اجمل أخصائية تغذيه وارقى اسلوب
حلو كثير روز ونحنا منفتخر فيكي اجمل جارة بالتوفيق
نحنا كثير محظوظين انو في عنا ناس متلك بالمجتمع وفخورين فيكي
نشف ريقنا لخلصنا المقال روز عبمزح حلو الكلام
روز لي بشوفك وخاصه على الصبح بتعطيه طاقه ايجابيه ولما الانسان يكون ايجابي يستوعب ما يقال له انتي بالنسبي الي هيك حتى لو بشوفك بسياره بسمه كلها طاقه
كلك ذوق بتجنني شكر ايلك على معلوماتك القيمه
مقال حلو كثير بس بتمنا توصل الفكره لانو فعلا في اهالي وخاصه الامهات من كثر اهتمامهم او حنيتهم او سمعو من اصدقائهم ابنك ناصح حرام خلي يرحم حالو معش ياكل او بلعكس ابنك ضعيف مثل عصايت الكومي خلي ياكل لينصح فبتجي الام وبتفش غلها بابنها بس لازم نعرف كمان في كثير من الاوقات حاله النفسيه عند الطفل تتأثر من اساليب او تعامل الاهل مع الطفل فبتعكس على شخصيه الطفل ان كان سلبي او اجابي ممكن في الاكل او كثرتو او قلتو او بلفوضه ولمشاكسه او بلعكس بينحذف لحالو وبضل وحيد حسب رأي الشخصي الدعم المعنوي للاطفال هو اسهل طريق للنجاح
روز بنفس قدر فخرك بهذه الام انا فخورة بك كلماتك صادقة نابعة من القلب هدفك سامي ونصائحك واضحك ومركزة ابنائنا اغلی ما نملك بالوجود وصحتهم مسوؤلية شكرا لك علی تخصيصك وقت لنشر مثل هذه المعلومات لنا ولابناء المجتمع .
واني فخوره اني تعرفت عليكي
كل الاحترام معلومات كثير مفيده وبتمنى انو الاباء والامهات على طول يحكو عن ايجابيات ولا دهن باي موضوع كان لان ها الشي بيساعد ببناء شخصيه الطفل موفقه روز وشكرا كثير على هاللفته الحلوي وعلى طول بتمييز
يا امي ماجملك ومأجمل اسلوبك ونفسيتك الحلوي وتفكيرك الايجابي والفعال للتغيير .
انتي التوب❤️
ونحنا فخورين فيكي كثير
ألاخصائيه المميزه روز الغاليه ،نحن نفتخر بوجود امثالكِ بيننا ،وكم أشكرك على هذه النصائح القيمه التي تقدميها دائما لنا ،شكرا لاهتمامكِ قد إستمتعتُ كثيرا بما كتبتي لنا ووصلت رسالتكِ الطيبه،مع دوام النجاح من القلب٠
الى كاتبه المقال الجميله روز عويدات وبعد :
مقال جدا مفيد ومهم ولكي جزيل الشكر على المعلومات القيمه ولكن عندي فقط ملاحظه بسيطه ,(الكتابه تكون بلغه عربيه فصحه ستكون اكثر تاثير على القارى وايجابيه ).وشكرا
شكرا كثير عالملاحظه..
معك حق 100%..افضل انو ينكتب المقال بالفصحى.
بس الحقيقه الحقيقه لغتي العربية مش كثير قوية وبفكر انو العامية بتوصل اكثر الناس..
نشالله عالمستقبل منشتغل عالموضوع 🙂
عنجد روز الف شكر لالك لفتي انتباهي لشغلي كثير مهمه وهي على طول بضلني قلو لابني امي كول صحنك كلو شايف كيف انت ضعيف ومن هل حكي كنت عبفكر اني عبساعدو طلعت العكس مره ثانيه شكرا الك وبتمنالك النجاح والتوفيق والتالق دائما
شكرا كثير عالكلمات الصادقه..شو بدو الانسان اكثر من هيك دعم وتشجيع..غمرتوني بلطفكن..
الانسان كل يوم بيتعلم شي جديد ومهم كثير ننشر المعلومات عشان نساهم بتطوير مجتمعنا..
نشالله عطول اقدر فيدكن بمعلومات جديده..الحقيقه في كثير مواضيع مهم نطرحها ويتناقش فيها عشان الكل يستفيد..
شكرا بعد مره من نص قلبي..
اني من الامهات يلي عبداوم لبنتي عند روز واني دومت قبل بنتي عندها انساني اكثر من رائعه تتعطي الانسان معنوي عاليه
وثقه بالنفس قبل ما تعطيه نظام غذائي شكرا الك روز على هلمقال لانو فيه توعيي للامهات لانو بنفكر احيانا انو عبنحكي او عبننتقد ولادنا لمصلحتهون وبنفكرش انو عبنجرهون بحكينا وعبنحطم معنوياتهم
مقال كثير حلو وشيق وكمان نحنا فخورين بوحده متلك بمجتمعنا
روز حلو مقالك كتير بدي اسالك اني ابني قليل اكل كتير بس جسمو رياضي وعصبو قوي بس كيف ممكن افتحلو شهيتو عالاكل ومن غير تعصيب مني وعناديي منو ، علما انو خيو الكبير بياكل منيح
هلا..
اول شي واهم شي ما نقارنوا بخيو.
كل طفل الو حجم معده والو الكميات يلي بتساعدو يحس بالشبع..
ما عاد تحكيه عن الاكل وتقليلو كول لانو راح يجاكر فيكي ويبطل ياكل..انتي هتمي بتنظيم الوجبات بالبيت يكون في فطور وغداء وعشاء وهتمي بنوعية الاكل تكون صحيه.. وتركيه هو يحدد الكميه المناسبه لالو. يمكن وزنو مناسب لطولوا وهو مرتاح مع جسمو هيك بس لانك عبتقارنيه بخيوا حاسي في مشكله!
معقول؟؟
شكرن كثير ع هلكلام لحو تشا الله بنجاح اولا امام
كل الاحترام معلومات كثير مفيدة وأتمنى ان جميع الآباء والأمهات يتكلمون دائماً عن إيجابيات أولاده
المقال بجنن روز