ضربة جزاء.. \ إيتاليكا

بيفوت هالرجال عالحمام بيحلق دقنو بيفرشي سنانو..وبأنتك حالو… وبيبخبخ عطر من يلي مرتو بتحبو وبيتمختر عغرفة النوم بروب الحمام.. بيلاقي مرتو بالتخت.. عأساس نايمي.. (خلو بالكن من كلمة عأساس..لإنو لحد إسا مش قادري ﻻقي مبرر.. ليش النسوان بيعملو حالهن نايمين وبيتهربوا من العلاقة الزوجية؟) بيقرب صوبها وبيهمس بذينتها: شو حبي نمتي ؟ لا صوت لمن تنادي.. بيلمسلها شعراتها وبيبلش يغازلها: قومي يقمري مشتقلك..

بترد بصوت هادي يا دوب قادر يتحرر من شفافها متل يلي عبينادي من تحت الأنقاض: إيه نايمي..

بيقلها: بس اني مشتقلك والنا جمعة ما سهرنا سوا..

بتفز متل النورية: وك انت معندكش احساس!! مش شايفني نايمي؟ كل النهار تركيض بالجمعية وشغل وتنظيف بالبيت غير مسؤوليتي مع لولاد..مش قادري وقف عجريي دخيلك حل عني.. بيرد بغضب: اي عمرك مبدك مش الحق عليكي..

وبيضيف بصوت واطي وهوي ماشي عالصالون: وك انتي خيانتك حلال… بس شو بدو يقول الواحد…

وبيبلش يدخن سيجارة ورا الثاني وبيفتح عفلم رومانسي من العيار الثقيل… وبيغفا بالصالون..

..

عالصبح.. بيفيق هالرجال من غير نفس وعقلة من مهلو بيفقس الكمكم ليعمل شاي.. بس بيتذكر انو قبل منام قرر يغير كل نهج قديم بالبيت..

فبينطلق متل الصاروخ عغرفة النوم وبيبدا فلم الانتقام..

– قومي لفيلي زوادي وعمليلي شي اشربو.. انتو النسوان متل “الراسول” إذا شال الواحد إجرو عنكن يتفنو بخلقتو..بينفعش معكن غير عين الغدر.. لانكن مش مقدرين النعمة يلي عايشين فيها..

بتحاول تتهرب.. بس بيرفع صوتو أكثر.. فبتقوم مرغشني لتكتفي شرو.. وبتركض عالمطبخ تجهزلو شو طلب..

بيقلها بشغل أمر.. سهر برات البيت معش في..

وكل يوم بدك تفيقي قبلي.. وبدي فيق لاقي كاسة القهوة عبتستناني وزوادي جاهزي من أحسن ما يكون.. وأواعيي مهيرين.. وأي تقصير مش رح يحصلك طيب..

جمعيات بتلغيها من حياتك ومصاريفك بدك تخففيها أني تعبت معش مجبور سكر خوازيقك.. وكلو كوم وقلة الاعتبار كوم ثاني.. ونفس بديش اسمع بهالموضوع.. وﻻ أي اعتراض..

بيزمرو برا.. بيطلع وهوي عبقلها.. اليوم بدي مقلوبي عالعشا..

بيسكر الباب وراه.. وهي بترتمي عالكنباي مصعوقة مفكري حالها عبتشوف شي كابوس بالمنام..

* * * * * * * *

لحد هون كانت هي الكوابيس كفيلي بانها توقفني قدام المراي لالقي نظرة عحالي.. بس هالمرة من زاوية مختلفي جدا.. وبعيدي كل البعد عن كيف كنت شوف حالي…وكيف صرت شوفها.. وللصراحة كثير خاب ظني فيني… يعني صار عمري بديش قلكن قديش.. بس انو مش صغيري وحضرت جنابي كل هالمدي يلي مرقت طلعت فهماني حالي غلط.. وعبحاول اتفهمن عالعالم..بالله مش غريبي!! ؟

لما الواحد منا بيشوف هيك شغلات بالتلفزيون.. بيقول مبالغة.. واف مستحيل تصير.. بس انو يشوفها مصورة بقلب بيتو ووقائعها حقيقية.. فهي شغلي شديدة المبالغة بالوجع… والاحباط..

إنو على أساس نحنا ملتزمين ببيوتنا ومهتمين بوﻻدنا ومش عمنحرمهن من شي.. طب ها الفشل يلي انكشف قدامنا منين اجا وكيف وصلنالو.. طب وين الرابط المقدس يلي مسؤول عن العلاقة الزوجية.. وهي العلاقة اللي بينا وبين شريك حياتنا.. شو اسمها!!.

تعود!؟ احترام !؟- ما لمست هيك شي- والا بس شاطرين نمثلو قدام الناس!؟

ممكن يكون اسمو حب!؟ طب معقول ها هو الحب!!؟ إذا عنجد الحب بيتجسد بهيك تصرفات.. فيا أسفاه على شبابنا..

طب شو لكان!!؟

في شي تفسير آخر أني بعرفوش!! ؟

طيب لنفترض انو كل الاجوبة مجتمعة.. هل ﻻزم نكفي حياتنا بهي الطريقة!! وإذا عبالنا نصلح هالعلاقة قبل متنهار وتنعكس على وﻻدنا أكثر مما هي مأثري فيهن… شو هي الطريقة الأمثل للإصلاح!؟ ومهم جدا نعرف إذا نحنا حابين نصلح.. والاصلاح بيجي بطريقتين متناقضتين..

الأولى بإنو نصلح العلاقة.. والثاني بإنو ننهيها.. وأي قرار مش هين.. ثنيناتهن بدهن مجهود كبير وتعب..

طيب بكل الأحوال.. لنعرف نصلح مشكلي معينة ﻻزم نعرف نحدد الأسباب اللي وصلتنا لعندها..

وهون حابي استعين بالقراء.. من خلال الحلقات السابقة اللي تم عرضها والحلقات يلي عبتواجهكن بحياتكن اليومية.. ومن خلال حلقات ما انعرضت لاحتوائها على مشاهد شديدة التطرف.. والألم.. (من اجل عدم تخطي حدود الرقابة المسموح فيها..) فتم حذفها لحساسية الموقف.. وحماية لمشاعر القراء..

وهون رح نعتمد على خيالك لوين ممكن يوديك..

أني حلقاتي ما خلصو.. بس عقد مشفت كوابيس.. مش قادري كفي لانو صار عندي عقدة من المشكلات المستعصية وﻻزم لاقيلها حل.. ماكتشف ما تبقى من مفاجئات محبطة..

واجا دوركن تعرضولي حلول لمشاكلنا كلنا.. أو وجهات نظركن بهالخصوص.. المهم.. شاركوني.. وفكروا معي بصوت عالي وبخط عريض.. الأهم مظلش لحالي..

تعليقات

  1. يا صديقي او صديقتي هذا الشي اللي عمنحكي عنو هو ملح الزواج متل ما بيقولوا يعني هاي هي الحياة الزوجي الحقيقيي لانها موجودي بكل بيت بالعالم وأمر طبيعي جداً يكونوا الزوجان متل البس والفاره بس بالأخير ما في حدا ينام زعلان من الثاني وها هو الحب بعينو اللي عمن دور عليه

  2. اول شي المقال كثير حبيتو وهلشي يا صديقتي عم يصير باكثرية لبيوت .. شغلي وحدي بس !
    لما الانسان ختار شريك حياتو عأساس رح يعيش معو العمر لي بقي..
    لازم يلتزم باشياء كثيري ويحسس لي قبالو انو ما في شي يشغلني عنك ابسط مثال : الزوج بيحب مرتو تكون عم تبرق برق وولا يوم يسمح لحالو يطفش منها ..
    لما يصير في خطأ بتوازن الأهل ,الولاد هن الضحايا..عنجد حرام !
    الزوج عليه كثير واجبات تجاه زوجتو والزوجه نفس الشي وممنوع التقصير, لانو يا جماعه يا ناس فتحو عيونكن اكثر !
    الخيانه موضه والله موضه,ديرو بالكن واللي رح يقصر مع شريك حياتو وما يعطيه الماكسموم تبعو رح ” يطفش ” هيذي الكلمي لي بتوصف وضعنا لما احدا الزوجين ما يحس باللهفه والانجذاب والاحساس والاهتمام الثاني رح يطير ورح يخون رح يطفش رح يخرب حياتو ومستقبل ولادو ..خلينا نكون واقعيين اكثر مانتو شايفين موضة هالطلاق طب شو ذنب الاطفال ؟ حراام والله حرام فكرو فيهن ب مستقبلهن كيف رح يكون..
    بيبقى لواحد عامل حالو سيد مجتمع واضرب واطرح واجتماعي يا ويلاه!
    بس ما في شي بيجمعو مع مرتو عتخت واحد !
    خلص بيكفي كرمالو هالمجتمع لورا ما بيصير هيك..

  3. تتزوج الفتيات والشباب العرب في مقتبل العمر في جو رومانسي مشحون بالشوق والرغبة . غارقين في سدر كنافة شديد الحلاوة . العادات والتقاليد القديمة طبعاَ لا تسمح لهم في السكن مع بعض قبل الزواج .. لذلك التجربة الواقعية بينهم محدودة , ما يعرفوه هو الفارس المحرر على حصان أبيض وهي فتاة ألأحلام حورية البحر .. الحياة بعد الزواج ستكون عسل مغمّس بعسل إلى ألأبد طبعاَ .. يتزوج وتتزوج ويزوجهم المجتمع بحفل مبالغ يكلف مبلغ كبير , وبعد هذا تبدأ قصة ألأصدام في الواقع يعيشوا كاغرباء في بيوتهم لا يفهمها ولا تفهمه .. يعاملها مثل سيارتة كاممتلك خاص , أما هي تسأل نفسها أين هويتي ؟ من أنا ؟ أو ما أنا ؟؟. وتبدأ التمثيلية الطويلة طولها طول العمر .أمام المجتمع الكل على مايرام لكن داخل البيت حرب أهلية .. كالدكتاتور يسن ألأوامر والقوانين وهي كخادمة عبدة تنتظر التحرير … أخوتي وأخواتي العرب عاداتنا وتقاليدنا تلفت وألآن تعفق رائحتها . حان وقت التغيير .

    1. يا اخي المعلق من بلدي المجدل يبدو انك متحرر. وتناسيت عادات اهلك وتقاليدهم

      1. لم أنسى بل أختلف معها جذرياَ وأعتقد بأن العادات والتقاليد العربية باتت مزيفة بالية تحرم المرأة حقها وتسلب الناس حرية الخيار وبالتالي السعادة . تشبة رائحتها رائحة القبور . شخصياٌ لا أريدها أن تكون جزأَ من حياتي .. أنا هو ولي أمري لا أحد غيري ..

    2. لا انت مبين عليك كثير متحرر بحياتك .
      اذا نسيان الشي المتربي علي وانت زغير معناتو انت انسان معندكش تراث وولا بتترك حكي اهلك ذكرى بحياتك او انو تعطي اهتمام لحكيهن ..
      نحنا البنات شي ثمين بالحياة ولازم الشب يعرف انو مش بسهولي بيقدر يتجوز بنت وحتى البنت لازم تضلها محافظة على حالها وممنوع تسمح لحالها بأنها تخون الانسان اللي راح يكون شريك حياتها بالمستقبل .. والكرامة شي مهم بحياتنا تنساش هالشي .. وكلمة اخيري بقلك هي :نحنا مش يهود .
      وسلملي عأهلك وقلهن ونعم التربية .
      اسا موضوع ثاني راح احكيك فيه انو شغلت الزواج اللي بدو يكش يكش .. وبقلك انو كل انسان بيدور عالسعادة اللي ناقصتو بحياتو واليوم وصلنا لمستوى بأنو الفايس مخرب كل شي اجتماعي بالحياة..كنا نلاقي الكل عببجتمع واسا كلو عبيختفي من حياتنا .. ها الشي مفقود وعبينفقد ..
      عالم منتهي معش في امل بشي ..
      تحياتي الك

  4. للاسف الرجل الشرقي يضع الحياه الزوجيه في اطار واحد وهو الجنس ،وعليه يحدد سعادته وتعاسته ،اذا غير مفهوم الزواج سوف نحصل على مجتمع سليم.وكاتب المقال يثبت كلامي

    1. لا يا اختي الشرقية الكاتبة اخر نقطه طرحتها هي موضوع الجنس في كثير امور بتصير بين الزوجين وطرحتها ايتاليكا بتودي لخراب بيوت فالاعتدال بكل شي مطلوب من قبل الزوج والزوجه حتى تستمر الحياة

    2. هذا هو بالظبط الانسان الشرقي بفكرش غير بالجنس
      بيقبل بكل شيي بفترة الخطبه وما بيهتم لشي
      لتجي الفرصه وبس يشبع ساعتها بيصحصح
      وبيصير يلبطط.

  5. الحب الذي لا يتجدد في كل يوم وليله ، يتحول إلى شكل من قوة الاستمرار ، وهذه في وقتها لا تلبث أن تتحول الى شكل من أشكال العبودية . أما البغض فهو جثة راقدة ، فمن منكم يريد أن يكون قبراً لهههههههها ؟؟؟؟

  6. الموضوع حلو وشيق وسرد ممتع من متابعتي لحلقاتك لاحظت شغلي انتي انسانة مبدعة خلاقا لافكار جديدي اما غلطتك الوحيدي والصغيري انو الافكار والافعال السلبييي مسيطرة عتفكيرك. الحل. كل فكرة سلبية قلبيها لايجابيي بسرعة حتى لو بدهاش تزبط بنفس اللحظة بس غيريها. لانو الفكرة الايجابيي هو اقوى بسبع مرات من السلبييي وكل كلمي وكل فكرة وكل حدث ايجابي بتزرعيي بعقلك. بتحصدي بحياتك.

  7. احترم جدا هذا الكاتب

    فعلا مطلوب التوقف….اصبحت المواضيع مبتذله وسطحيه تتناول زوايا هامه فتفقدها عمقها…

  8. اعتقد وحسب رأيي انو احنا شعب ناقصو خبرة بالحوار والاستماع للغير وتحمل الغير وحط حالك محل اللي قبالك.. شعب هاتي يا نفسي وزلمة اللي بقرب علي …. عاملين حالنا منفتحين بس منغلقين عن كثييير شغلات … مفكرين حالنا فهمانين بس للاسف مش فاهمين … منلوم التقاليد بس مش هي السبب … في اشي اسمو علاج زوجي ،في اشي اسمو עיצוב התנהגות، في اشي اسمو علاج نفسي وفي كثيير اشياء كمان … بس وين احنا ووين هي … عيييب … شو بدن يقولوا عني … بديش حدا يعلمني .. وهيك مع النفسيات ال****** والحقيقة اللي بدناش نصلحها بتصير حياتنا حرب اهلية دموية يا بتسيب خراب يا بتسيب فراق يااا عيشة عشان السترة ….
    طبعا الحكي هذا بيشملش الجميع بس عالاغلب هيك

  9. نصيحة ظلي معظي زوجك لحتا يطلع منا إلبيت او يحب عليكي وها يلي مإبدناش ايه

  10. المقال حلو كثير بس…
    يا ريت حياة كل زوح حبو وبعض وتزوجو بعض بتكفي كيف بدت.. كثير حياتنا بتواجه مشاكل مع طول مدة العلاقه ان كان من ناحيه تفاهم.. او من ناحيه مشاكل وهموم الحياة او من قلة الفهم والتفاهم بين ال زوج..
    برأي الحياة الزوجيه لازم تكون كـ معبد لبحتلف نهائيا عن الدين.. ال زوج ثنيناتهن لازم يطلعو على انهن هن الاساس لكل خطوة بحياتهن ليبنو عليه اي شي حلو او صعب بيمرقوا فيه.. لازم اني اطلع ع حبيبتي انها هي كل شي بحياتي وهي لازم تشوفني هيك بالمقابل.
    .. ولما اني اتهرب منها او العكس.. فـ نتيجه وحدي فش غرا بتكون الخيانه شقت طريقها..
    نصيحه::: الحب اجمل شي نوجد بالدنيا وفش شي بلاه بيحلا .. والثقه اساس الحب.. كتفوا بـ يلي عندكون او متجوعوو بعدين.

  11. الحب اجمل شئ في العالم وعلا الزوجين ان يحافضو علا علاقتهم الزوجيه بعده طرق فهم يبنو وهم يدمرو التفاهم اهم شيئ بين الاثنين وهنا انا اقول ان الزوجه دخلت مجال العمل اكثر من الرجل ويجب ان يكون يدا واحده والاقليه من النساء الذين لا يعمل وهذا العمل يعطي الرياحه النفسيه للعائله وعلا الرجل ان يصبر اذا كان يريد اي شئ من زوجته يجب ان تلبي طلب بسرعه ممكن ان تكون غير مرتاحه او تعب انه فيجب ان يتعاطف معها لان الحياه صعبه جدا فهذا هو راءيي

  12. أعيش و مقيم في أوروبا 25 عاما . العلاقة الجنسية بين الجنسين قبل الزواج وبعده أمر طبيعي، لكن نسبة الطلاق تقريبا 50%. احباءي الحياة والعلاقات الاجتماعية في مجتمعنا الشرقي هي من أشرف و ارقا العلقات. الخلاف بين الزوجين أمر لا محاله منه و هو ملح العلاقة الزوجية. إذ كان هو أو هي متعبين في السرير فهاذا ليس سببا بأن يكون المرء في اليوم التالي غضبانا على الشخص الآخر. ليس الزواج فقط هو النكاح كما البعض يفكرون. العلاقه بين الزوجين هي أكبر من ذالك. اعتذر عن الأغلاط في اللغه العربيه. جولاني

    1. ان ما ذكر في هذه الحلقة ما هو الا اختتام لحلقات كانت قد عرضت في مراحل سابقة.. وختاما لكل المآسي التي يعاني منها الزجين وعائلاتهم.. لو قرأتها جميعها لغيرت في تعقيبك..

  13. ايتاليكااااا اني بطلب منك تكملي بحلقاتك وتعرضيهون علنا كل فترا … اني شب زغير بلعمر ومش عايش مع أهلي ومعنديش الخبرة الكافيي لاني اعطيكي حل …. بس بسبب صغر عمري بحب عطول شوف حلاقاتك لحتا أتعلم لحياة الزوجية كيف ممكن تكون بأسلوبك الساخر الكثير حلو …. عنجد بتمنا ضلني اقرأ حلقاتك … شكرًا الك …

التعليقات مغلقة.

+ -
.