فكر بصوت عالي.. \ ايتاليكا

كن نفسك..

امتا بتعرف انو انت عنجد صرت الشخص يلي انت حابب تكونو!؟
لما بتوصل لمرحلي تكون فيها رضيان عن نفسك مثلا!؟ لما تكون ناجح بشغلك أو بعلاقاتك الاجتماعية!؟ محبوب بين الناس ومرغوب فيك!؟ معك مصاري كثير!؟ متفوق!؟ زاير نص بلدان العالم!؟ واثق من نفسك!!؟
أسئلي كثيري بس يمكن لنعرف نجاوب عليها لازم نتمعن شوي بالإجابي.. لنكتشف انو الذات بتشكل النفس البشرية.. بعيدا عن الانجازات الخارجية الملموسي..
انك تكون ذاتك يعني تكون شبعان بالاشياء يلي عندك…من دون متكون كسلان بس تظل محافظ عطموحك..
كيف بتعرف انك شبعان!؟ لما بتوصل لمرحلي بتبطل فيها تغار من الآخرين… مع العلم انو
الغيري صفة مش سيئة إذا بتتوظف بالموقع الصحيح..
ونحنا كبشر وضعيفي النفس.. الغيري بتاخذنا عمسارين مختلفين.. إما عالمسار السلبي اللي هوي الحقد والحسد ومحاولة تدمير الغير… او عالمسار الإيجابي واللي هوي محاولة تطوير الذات.. من خلال تحديد الصفات يلي بتميز الأشخاص اللي حركو الغيري جواتنا ومحاولة تحسينها داخلنا..
كيف منحسن داخلنا.. من خﻻل تدريب النفس على تسليط الضوء عالصفات الحسني الموجودي بالآخرين والانتباه للإيجابيات وغض النظر عن كل شي سلبي… والاهتمام بالأشياء يلي بترجع علينا بالفائدي الذهنية والنفسية والأخلاقية..
ومن خلال قراءة كتب متخصصة بهالمجال.. وأهم شي تكون واثق من نفسك.. ومن الأشياء يلي انت عبتبذل مجهود لإصلاحها جواتك.. من دون متسمح للآخرين بتحطيمك أو إبعادك عن المسار الصحيح.. حتى لو ما حبوك.. المهم انت تحب نفسك وتحب الخير يلي عبتحاول تنميه جواتك.. وتحافظ عتواضعك لإنو الثقة بالنفس بتعنيش انك تكون مغرور وﻻ فوقي.. ومحبة الآخرين لإلنا مش نحنا منحددها .. إلا بالعكس نفسياتهن وأخلاقهن هي يلي بتأثر عمحبتهن وتقبلهن الك.. وانت مش مسؤول عن سعة إدراكهن..
يمكن انت متقدرش تعمر البيت يلي كل عمرك تحلم فيه… ولا تركب السيارة يلي بالك فيها ولا تشتغل بالوظيفي يلي بتناسبك..
بس سدقني بالرغم من كل أحلامك يلي ما تحققت وطموحاتك يلي ما قدرت توصلها، انت بتقدر تكون نفسك.. وتوثق بحالك..
كيف!؟
كمان مرة بتهذيب النفس وتعويدها عالإيجابية.. بتقبل الآخر من دون منحاول نحولو لنسخة مشابهة إلنا… من خلال إيمانا بالاختلاف.. القناعة بإنو من حق كل شخص يكون نفسو..
الاعتراف بنجاح الآخرين ومحاولة تحسين قدراتنا الداخلية واستخراج الطاقات الكامني داخلنا وتحويلها لسلوكيات حميدي نتميز فيها..
التعامل مع الآخرين بانسانية وإعطائهن الفرصة يعبرو عن رأيهن بحرية بالطريقة يلي بتناسبهن.. عدم الحكم عالآخرين من خلال مقارنتهن فينا..
عدم السخرية منهن ولا تحطيمهن من خلال تحويلهن لسيري وانفتحت مع زفين… بحد ذاتو هذا اقرار شفهي مننا بنجاحهن..
ومهم جدا ما نحول حياتنا لمقارنة وبالتالي لمنافسي غير شريفي مع اللي حوالينا..

بعالمنا كل واحد شايف حالو الصح لإنو عبينظر من زاوية مختلفي.. ومن منظار مغاير للآخر.. وللحقيقة في عدة وجوه وكلها صحيحة.. بيتعلق من وين انت شايفها ..والأهم كيف انت حابب تشوفها..
فقديش حلو نوسع آفاقنا ونعطي مجال لأفكارنا تسبح بحرية لنقدر نحقن نفسياتنا بمفاهيم صحية وندعم طريقة تفكيرنا ونصقل شخصياتنا بطريقة صحيحة ما تأثر سلبيا على الآخرين.. وبنفس الوقت ترجع بالفائدي علينا وعليهن..
قديش عظيم تلاقي نفسك.. وتكون نفسك..

شو عبتستنا!!؟