فهم المقروء السلبي – ايتاليكا

فهم المقروء السلبي.. ما بعرف اذا هي مشكلة او هي ورطة بترافق سوء النية.. وبتخلي الناس على طول تروح عمنحنى معاكس تماما للمعنى المقصود.. أو هي عنجد تشوه عقلي مكتسب.. يعمل على تغذيته شرش عاطل مرتبط بالعادات السيئة!!
بعتذر على هذه المقدمة.. بس بأسف كثير لما بتكون نيتي صافية وبتحارب على شي انا ما كتبتو بس لانو القارئ يملك ثار شخصي مع كتاباتي أو معي.. وبتأسف أكثر لما معقب “مثقف” أو ربما يدعي الثقافة بيكتب كلمات نابية وبيستعمل مصطلحات أقل ما يقال عنها “سوقية” وبيحارب المقال وكاتب المقال على فكرة ما انذكرت أصلا بالمقال..
لما تقرا مقال ويستفزك.. حاول تقرا كمان مرة مش رح تخسر شي.. حاول تفهمو وحاول تكتشف شو يلي استفزك فيه.. لحتى لما تعقب تكون حجتك ونقدك قوي بيخلي الكاتب نفسو يرفعلك القبعة تقديرا على نظرتك الثاقبة ونقدك الفتاك..
من زمان واني بكتب وكثير مرات بينكتب نقد ضد كتاباتي.  وولا مرة الشي ضايقني وما كان يضرني بالعكس كان يلفتلي نظري لبعض النقاط اللي سقطت سهوا عن تفكيري.. بعمري ما قللت من احترام حدا ولا حاربت حدا لا تحت اسمي ولا باسم مستعار..
واللي بيعرفوني بيعرفو منيح قديش كان النقد يسعدني لما يكون بناء..
الفرق بين الشخص الانساني عنجد وبين الشخص الذي يدعي الانسانية هوي خيط رفيع كثير بس نتائجو واضحة وضوح الشمس..
فرق كبير لما انت تطرح فكرة بتخدم المجتمع وتدافع عنها بالوقت يلي هالفكرة ما بتخدم مصالحك بالعكس يمكن بتضرها.. بس انت تفضل مصلحة المجتمع على مصلحتك الشخصية.. لانو بتحمل جواتك روح الفريق الواحد.. وتحاول تتأقلم لانو هدفك تبني مجتمع ناجح وحابب تساهم بتخطي كثير عراقيل قدام الجيل الجديد الجاي.
حابب تجهزلهن أرضية صلبي ينطلقو منها من دون ميغرقو بوحل المشاكل يلي غرقنا في نحنا.. حابب تشكل يد مساعدة لإعمار البلد من دون أي نوايا شخصية.
الإنسانية مش تكون انساني مع الحيوانات.. الانسانية تكون انساني مع الانسان نفسو..
اني بفتقد كثير من معالم الانسانية بس عالقليلي عم حاول صير..

بيسألوك ليش بكتب باسم مستعار!؟
منكتب لانو نحنا مجتمع تعود يتعامل مع الحدث حسب أبطالو من دون متلفتنا وقائع الحدث نفسو.
منكتب باسم مستعار لان عبالنا نسمع نقد حقيقي حول شو كتبنا مش حول مين نحنا..
منكتب باسم مستعار لانو عبالنا نتناقش عالأفكار  مش عالاسم..
منكتب باسم مستعار لانو غالبا عنا فكرة مسبقة عن الاشخاص يلي قبالنا.. اما حدا عطانا اياها أو نحنا كوناها بلحظات غير متكافئة مع حقيقة الشخص.. ولا شعوريا ردة فعلنا مع المكتوب بتكون حسب نظرتنا للشخص..
منكتب باسم مستعار.. لإنو كل شي منكتبو بينسب لحياتنا.. وبيتم المقارني بينو وبين كيف نحنا عايشين.. وكإنو الكتابي لازم تكون بتعبر عن حياتنا الشخصية..
بنكتب باسم مستعار.. لانو اذا كان عندك حس اجتماعي وبتحاول تشرح وجهة نظرك للناس .. بيسموك متفزلك..
مع انو عنجد الفزلكة ما بتشتكي من شي..

رح اقترح عليكن اقتراح صغير ما الو علاقة بالمكتوب فوق..
شغلو جهاز تسجيل الصوت تبعكن ما رح قلكن ليوم كامل لان ساعة وحدة بتكفي..جرب شغلو بقعدة من قعداتك مع أحد افراد العائلي أو الأصدقاء او حتى بالعمل.. حاول بعد متسمع التسجيل تدور بين الدقايق المسجلة عن جملة وحدة مفيدي.. حدث يستحق الذكر.. أو تفكير منطقي..
ما رح استبق الامور وقلك شو رح تكتشف.. بس اكيد رح تكتشف شغلات ما كنت بتعرفها بحالك..
“يمكن الشي يخليك فخور بحالك.. ويمكن تستحي من حالك.. “

من الطبيعي جدا تكون ما بتعرف يلي قبالك لانو حتى نحنا ما منعرف حالنا عسوى..
فعطو فرصة للي قبالكن يعبر عن نفسو بطريقتو الخاصة.. تقبلو.. احترمو رأيو حتى لو ما عاجبكن..
نحنا مش عايشين بحرب.. ولا فاتحين جبهة عالنت.. هوي مجرد رأي أو فكرة بتنطرح ما بتستحق هالطاقة السلبية كلها..

إيتاليكا..

تعليقات

  1. كثير حلوه كتاباتك والاسلوب كمان بيجذب انو الشخص يقرا المقال . قال احد الانبياء ومن الحيوان تعلمه مره واحده ويفهم عليك . ومن الانسان من تعلمه الف مره ولا يفهم . السيد المسيح قال من كان منكم بلا خطيئه فل يرمها بحجر ونحن بني ادم كلنا خطائون . نرى عيوب الناس ولا نر عيب انفسنا . الجولان بدأ يسقط الى الحضيض فلتان الله يستر لا سائل ولا مسؤول بتطلع البنت امتا بدها وبترجع كيف بدها وبس يسألها بيه وين كنتي بتقلو ما دخلك واذا رفع صوتو عليها بتجبلو البوليس وبتحبسو الله يكون بلعون
    ايتاليكا اكتب/ي الله يوفق

  2. هلشي يلي حكيتي عن اذا بتكتبي اسمك بيصيرو ينتقدو كتاباتك حسب شخصيتك ومرات كثير يلي بتكتبيه بيكون مش شي عايشتيه شي عبتشوفيه وبتحكي عنو لنصلح المجتمع اني صرت منتبهه اذا بقعد مع ناس وبحكي راي شغلي شايفتها دغري بحللو الشغلي حسب شخصيتي ويلي بيقعد ينتقد بيمقالاتك علفاضي والملان بيكون انسان فارغ معندوش هم بلدنيا غيرالاعتراض وعدم تقبل الاخرين ورايهن لان بيكون هوي مش متقبل حالو

  3. كلامك صحيح ومقال حلو كثيررر ورائع بس الناس عنا قاعدي للفلسفي والتعليق وما بتعرف شو بدها بس مهم إنّو علقت يا ريت على طول بتظللك تنزلي مقالات

  4. ايتاليكا اني كل يوم بفوت عالموقع بس لحتى شوف اذا نزلتي مقال جديد بستناكي ستني ويا ريت ما طولي بين المقال والمقال لان كتاباتك رووووووعه

  5. معك حق اني بايدك
    بس لمقال يلي كتبتي اخر شي تبع قاعة الياسمين كان فيهو اشيا بلا منطق ومستحيلي بمجتمع متل مجتمعنا
    بس بشكل عام كل الاحترام لا الك يعطيكي لعافي

  6. عنجد كلامك كثير واقعي عندك نضره ثاقبه بتحليل الموضيع اني معجبه بكتابتك ضل كتبي بلكي بتسعدينا لنفش خلقنا عن طريقه لكتابي وشتقت لعرفك

  7. معك حق بكل شي حكيتي وخصوصي انو لو بتكتبي باسمك الحقيقي انتي او غيرك كانو قيمو الشي حسب الشخص ومكانتو بالمجتمع مش قديش الحكي مهم، بينما اذا حدا كثير مهم ومبين شغلي بالبلد ولابس شغلي كثير بشعة فبشوفوها الناس بتجنن لانو مش معقول هالشخص مش مذوق بفكرو عيونن بطلت تشوف منيح!!!

  8. “ايتاليكا” اني بعرفك قلباً وقالباً، اني مرات كثير بحسدك ” بنيه طيبي ” على عفويتك وصدقك وطيبتك وبتمنى تظلك تكتبي يلي بيخطر ببالك على طول لأنو يلي معني يتعلم ويتقدم في ياخذ من كل شي بالدنيا الشغلات الايجابيي واني بهنيكي

  9. كل شي بتكتبي بيحكي واقع مجتمعنا واني بايدك بكل مقالاتك لانو كلها حلوة والى الامام

  10. عنجد انو كلامك بيحكي لواقع لموجود عنا. كب الاحترام الك ولكلامك. وخليكي عبتكتبي عطول. عمنستنا بعد مقالات. شكرا

  11. اني بأيدك وبزيد هوذي من عندي هيا بنا نستيقظ ونفيق من غفلتنا ونومنا العميق الذي بدا يحتل انفسنا مثل المرض والوباء الجماعي نحن سكان البلد ولدنا لنكبر ونكبر ونفتخر باعمالنا وافكارنا لا لننجرف ونتنازل عن كل مبادئنا وعاداتنا السليمه كان يا ما مكان نسمع من جدودنا واهلنا عن الناس يلي رفعت راس البلد بكل شي عندها من محبة واحترام وينا اليوم يا ناس من كل العالم مبين علينا دوّرنا عنخبة الاعمال والتصرفات الرديئه وجذبناها لإلنا وتمغنطت بعقول الاغلبيه فصار السوء يغلب على سمعة البلد وين ما رحنا وين ما يجينا اسم الله علينا صاير سيط المسك غالبنا للاسف هو العكس صحيح فعنا كبير وعنا الشيخ وعنا الواعي والمتعلم وعنا يلي بينهم لاهلو وناسو فكثير عبينطلب انو يصير وعظ ومحاضرات وتوعيه والحمدلله ما حدا بهيك مقصر فيا ريت يحتل الادب والعلم والعمل الصالح والرداء الغير فاضح لنخفف عنا عقاب واهوال القيامه لانو هذا بيشملنا كلنا نحنا سكان بلد وحده لازم نتعاون عالخير ونكبح الشر فويل لأمة رضيت وسلمت واستسلمت للمساوىء والمنكرات ونعمٌ وخيرات حلّت على أمة ردعت ومنعت وزرعت الخير في نفوس شعبها ما دام ينبض في القلب دقات تخص بلدي وأمتي وأهلي وناسي وكلي امل بمبادرات وتغيير وتبديل كل ما هو سيء بجميل فالى الامام لنرتقي وتكبر حدقات اعيينا في ما نسمع ونفتخر عن كل ما يخصنا من الواجب السعي وبذل الجهد في هذا لاننا كلنا مطالبون به في النهايه كلي امل ان يدّرس في مدارسنا ويخصّص درس تراث ولا يستبدل بدرس يخص المربي كلٌ له حقُه لماذا لا نحترم ديانتنا ونرسخ في عقول ابناؤنا عاداتنا وتقاليدنا الصحيحه فكل ديانات العالم تعلم أسس وركيزه منذ الصغر نحن يُلتغى درس التراث لا سائل ولا مسؤول المهم انه اشترينا الكتاب

التعليقات مغلقة.

+ -
.