قلي يا غالي.. نائل الصباغ في رثاء المرحوم سميح محمود

z

قلي يا غالي كيف بدك صدّقك ؟!
وانت بزمانك ما كَذبت بحرف
فلّيت عالحارك قبل ما حَدّقك
مستعجل وبتقول عندك ظرف
وْرْكَضت خلفك بالعتم تَ سَبّقك
ودموع عيني عليك تذرف ذرف
وْوْصلت للحفي قبل ما لحّقك
ناديتك وصرّخت تَ صوتي ختنق

ورجعت صدقتك عكتف الجرف

قلي يا غالي كيف بْمْحي ضحكتك؟!
لمطاردتني بكل ذكرى الامس
بمرق وبسمع بالشوارع فرحتك
بشوفك بكل شجرة بمجدل شمس
وصَوتك العنّوَن بالتميّز صَفحتك
مخلوط من زأرة اسود الخمس
قلي يا غالي كيف بنسى جرحتك؟
بترجّف البنيان لو صوتك يصيح

وسبع المراجل لو بتهمس همس

قلي وانتْ متعود تلبّي؟
من وين كنت تجيب لمحبّي
لو شفت شعبك بالأجر شو قال
عملوا الك فوق الغيم قبّي
كيف قدرت تخترق هالأجيال
وتدخل عقلب الكل وتعبّي
وبعرف بأنك ما عملت افعال
تَ الناس تمدح،، كنت متخبّي
لا تخاف بدّي طمّنك بالحال
كل شي انذكر عنك بيوم الأجر

من بيدرك بعدو انذكر حبّي

يا بو كرم ملّيت قلبي بالجروح
ما كنت متخيّل بأنك رح تروح
كنّا معك عمنشبه جبال الدني
القمة انت نحنا على جنابك سفوح
يا معلمي يا صاحب القلب الغني
قديش طاعم زنبقك فينا شلوح
علّمتني لاقي الحقيقة البيّني
ومن خَيل نفسي خففت حِد الجموح
علّمتني عالدهر جدّ وأعتني
واصنع من القلة الجناين والصروح
عَلّمتني عالحق إظهِر معدني
وأتحول لصَخرة العطر منها بِفوح
غيابك يا غالي من صميمي هزّني
وكاس الحقيقة المر صعبي ينبلع

وصعبي نقابل متل روحك بعد روح

الله معك يا صاحبي..
نائل الصّباغ

تعليقات

التعليقات مغلقة.

+ -
.