-الكابوس الرابع-
اندق الجرس وفتحت ست البيت الباب.
-هون بيت اكس لا على التعيين!؟
باستغراب -اي تفضلو..
-نحنا من شركة ابيض ابيض انتي طلبتي خدمتنا و جايين نساعدك عتنظيف البيت..
وهون بترتسم ضحكي طويلي عريضة عوجه الزوجة وبترد بكل كبرياء كونها تحولت بلحظة من ربة منزل لرئيسة قسم.-تفضلو لعرفكن عشغلكن..
وبتبلش سلسلة الأوامر..
ليكو حبيباتي جايين ضيوف كثير مهمين.. وبدي البيت عبيبرق برق كيف.. هي شغلتكن.. يل فرجوني همتكن.. بالمطبخ بالصالون الحمامات عالحيطان عالواجهات والبرندات خليني شوف قدراتكن..
والمي تزقح… 6 ساعات فدا النظافي…. لكان.. وخلي الفاتورة تطج آخر الشهر.. شو حدا سائل!؟
وبعد متلاقي ست البيت انو ريحة البيت واصلي لآخر الشارع وعيونها معمصين من اللمعة وتحط لايك للنتيجة النهائية.. وكومنت ببسمي عالمية..
بتنتقل للمهمة التالية..
بتوصل الخياطة ومعها اربع خمس كياس كبار.. عفوا شوالات اكبر بكثير من شوال الطحين..
وبيبلش استخراج المفاجئات مع وصول الزوج من العمل.. بيفتح الباب وبيفوت مذهول.. لا مش من النظافة وﻻ انتبه أصلا انو البيت منظف.. شحشط حالو شحط عأقرب كنبايي فنجر عيونو بذهول فتح حلقو وعشوي نزلت ريلتو من الصعقة وبلش يتفرج من بعيد..
وبلش مهرجان تركيب الفرش.. وصرخات المره ونطنطة: ياي شو حلوين، إصحك تكوني ركبتي لحدا منهن قبلي برجعلك اياهن..
الخياطة: يه تعدميني موعدتك.. (وهي بتكون مخيطة لنص اهل البلد ووﻻ حدا عارف بالثاني.. لانو الناس بطلت تستقبل بعض بالبيوت مشان تظل بيوتهن نظيفي.. ويهون عالجمعيات يلي رجعت تعمل لمات)
بيرجعو بيفتحو الكيس الثاني وبيستعينو بالزوج لتركيب البرداي.. والزوج بصعوبي عبيبلع ريقو وجوزتو بدها تطق بس شو بدو يعمل مظطر ينفذ من تم ساكت مشان يحافظ عبرستيجو قدام العالم.
وبيوصل بياع الموكيت جايب سجادة صوف فرنسية (غنية عن التعريف).. وبعد ميترتب كل شي محلو.. بيبلشو ينثرو هالركايات بكل الالوان لتكتمل اللوحة الفنية.
وبتبلش هالزوجي تتمشى يمين وشمال بفخر واعتزاز.. وتتأمل هالغرفي ومبسوطة عقد مطلعت حلوي..
وبتروح عبتتغنج لعند زوجها.. وبتقعد لزقو وبتحط ايدها عفخذو وبايدها الثاني بتبرملو وجهو صوبها وبتقلو: بتسدق ما توقعت تطلع حلوي هيك!!! ياي شو مبسوطة ما مسدقة يجي بكرة لشوف ردة فعل صاحباتي.. خليهن يطقو كل مرة بيلاقو عندي شي مميز.. شدتها ليشوفو طقم القزاز يلي جبتو.. شي بياخذ العقل… ما قلتلي شو رأيك حلوي!؟
بيرد ببرود: انت عاجبتك!؟
-قال عاجبتني وك بتجنن، بعدني ما شفتش اجمل منها.. وك اخ صقالله ليجي بكرة..
-حبيبتي حطيلي عشا عبينما اتحمم..
ومتل الصاعقة بينزل عليها الخبر..:عشا!؟ عشا شو.. وبتبلش نبرة الصوت تعلا شوي شوي.. وك من الصبح واني واقفي عقصب جريي سألت حالك.. هالبيت مين نظفو وكيف ترتب وك كل النهار تركيض مشان شو!!؟ مشان اعمل جمعية نجمع فيها مبلغ محترم ساعدك في.. شو انجق لو بدي اخذهن الي.. وقبل ميبلش فلم الزعيق..
-عشا مين!! تصبحي على خير حبيبتي…
وبترجع علامات البسط على وجه الزوجة اليوم ما رح يقدر شي يعكر مزاجها.. مأوظتها أجمل أوظة بالبلد.. (طبعا بعيدا عن التكاليف.. شو دافعة من جيبتها.؟ خليه ينبكت هالرجال حدا قلو يتزوج؟)
وتقول كإنو عبيقرا أفكارها بيصرخ من جوا- دخلك قديش كلفت!!؟ ما بترد.. -وكيف نويي تدفعيلن!؟ ولا كإنها موجودي بالبيت.. -طب اه أكيد بيك قطع فيهن شيكات!!؟ وهون جاب سيرة بيها فالموضوع معش يحتمل.. فبتصرخ من بعيد.. – وبيي شو دخلو!!؟ حضرتك تزوجت بنتو ومجبور تصرف عليها وإلي مش قد الزيجي بلالو منها وهي الغرفي جددناها مشان نفتحلك عينك قدام ضيوفك بس مش الحق عليك.. الحق عليي اني لك ما بيكفي عاملي جمعية مشان ادعمك…!؟ عنجد انك بلا بقوي..
-وك خلص، خلص بيحتار الواحد شو بدو يرد ليرد.. ولكن الصبر اوجب..
بترجع تبتسم.. مع غرفة جديدة مفيش مستحيل..
وبتنطلق عالمطبخ وبتبلش تحضير كيكات الجمعية..
من كعكة ساخنة.. لكعكة بالجبن.. لكعك الطبقات الثلاث.. والموس والجيل وكثير دواوين وصراحة ما عندي خبرة كثير بمجال أسمائهن بس بعرف انهن بالشكل كثير مغرين.. اما بالطعمي.. فما حصلي الشرف.. وبوعدكن للحلقة الجاي استوردلي كم اسم لتفهمو عن شو عبحكي..
وما بتخلص صديقتنا تجهيز للساعة 2 بالليل.. وبتنام طب وبلا هدهدي.. في انتظار قدوم المعازيم..
يتبع…..
