واضح للعيان…

ملاحظة: هذه المادة ليست تابعة لسلسلة حلقات “خياني مدروسي ونتائج معكوسي”

بتعرف شو يعني تفيق صباحية العيد وابنك ما عندو لبس جديد.. حتى لو انت مش مآمن بهالخرافة او عبتحاول تتشرب هالفكرة منشان تريح ضميرك من فشلك بتأمين مصاري ثمن بدلي رخيصة يلبسها متل وﻻد جيلو!!؟

بتعرف شو يعني كل يوم الصبح تطلع من بيتك بلا فطور لتلحق شغلك وتتحجج انو ما في وقت تفطر.. بالوقت يلي انت اصلا صاحي من الساعة 6 بس ما عندك خضرة بالبراد… ومش قادر تشل بيدون لبن تسويي لبني.. ووزنك ينزل.. والكل عميسأل عن السر وميتين لينصابو بنفس العدوى..

بتعرف شو يعني تتحمم بصابون زيت.. وتغسل شعرك بشامبو ركيك ريحتو كريهة وبيعربس الشعر تعربس وبدك تستعين بخبير خطوط ليفك التشابك المتقن والغير مدروس يلي بيتكون بسببو..

بتعرف شو يعني تفيق عشغلك كل يوم.. وتارك وﻻدك بالبيت من دون رقيب.. لتلحق لقمة العيش يلي عبتركض قدامك وتناحر فيك وتهرب منك وانت مصر تلحقها… ويا ريت قادر تكمشها.. بس الحلو فيك انو الامل موجود وبعدك عبتقوم عالشغل كل يوم الصبح.. بهنيك…

 

بتعرف شو يعني تلبس ثياب باليه!! وما تنبهج بس تشوف التطورات والعمارات بالعالم.. لانو حلمك تطبخ طبخة مقاديرها كاملة!!

بتعرف شو يعني تعيش بالقلي وترضى بالقليل مشان ما تخلي عليك ولا حبة دين بلكي بتفرج لقدام!!؟

بتعرف شو يعني تروح لتجيب ربطة خبز ويقلك الدكنجي.. ما بقدر اعطيك لانو حسابك كبر وصار لازم تسكرو.!!؟

بتعرف شو يعني يقطع المجلس عنك الكهربا لانك مش قادر تدفع والمبلغ عبيتراكم شهر ورا شهر مع العلم انك ما بتعطل وﻻ يوم!!؟

بتعرف شو يعني يجي الشتا وما تقدر تأمن نقلة حطب تدفي فيها بيتك وولادك!!

بتعرف شو يعني تعطل تلاث تيام العيد وينخصمو من اجارك !! عأساس لتعيد… طب مآخر الشهر أكيد بالبنك “بتعييد” وشو يعني بالشتا قاعد واجارك واقف ومصروفك عادي ماشي بابسط حقوقك..

بتعرف شو يعني تشتغل كل الشهر وتترك بيتك وولادك ع1500 شيكل.. ومن دون تلوش مسكورت ولا تأمين يضمنك واذا وقعت ببساطة بيستغنو عن خدماتك من دون ما أي شي يثبت مستحقاتك.. وإذا مش عاجبك عادي في ميت حدا بيشتغلو محلك.. وانت تسكت لانو عبينما يعترف المجتمع بحقوقك بيكون اجا اجلك..

بتعرف شو يعني تحس انو عأساس سكرت ديونك.. وخلص مشي حالك وتعبك ما راح عالفاضي وبلشت تحصد نتيجة مجهودك وتجيك ضربي عراسك توقفك عن الشغل وترجعك سنتين تلاثي لورا.. وترجع تركض وحماسك عميخلص وثقتك بالحياة عمتتلاشى!؟

بتعرف شو يعني حقوق!!!

تاع دفاع.. والنا عليك.. بدنا منك.. وتفضل هات..

وبتعرف!!!

لبينما تعرف شو يعني.. بيكون الخير يلي فينا مات ونشاطنا خلص والوحش اللي جواتنا تغذا وجع وتملى حقد.. والله اعلم شو بدو يخلف..

وبيسألوك ليش هالجيل صايع!؟

طب اني بدي اسألكن!!

هالجيل من ضيعو!!

الفساد من أسسو!!

وحقوقنا مين أكلها!!؟

المجلس المحلي.. المحامي .. منهيل الحسابات.. وخريجي الجامعات المثقفين عأساس… شو وظيفتهن بالمجتمع ولأي درجي بيأثرو عارتفاع مستوى المعيشي بالبلد!!؟

 

ولانو الوجع ما بيوجع غير صاحبو…

رح اتركلكن التعليق..

+ -
.