«قدسية» باب الحاره
ياسر الشوفي - 08\10\2008
| باب الحاره السوريه | |
| قصه حلوه وشعبيه | |
| شغلت بال الناس كثير | |
| بيطلعلها شي قدسيه | |
| منبلش بابو شهاب | |
| العقيد وشيخ الشباب | |
| المخرج عبيحسبلو حساب | |
| من الحلقات الماضيه | |
| اما بو قاسم خيو | |
| يمكن طالع لبيو | |
| بالحاره ما في زيو | |
| عندو النيّه صافيّه | |
| ابو عصام الحكيم | |
| توفى من بعد الزعيم | |
| صارت قصه وسين وجيم | |
| ومش مفهومه القضيه | |
| معتز زكرت مخصّل | |
| شب معدّل وماصّل | |
| من المسلسل شو حصّل | |
| ما تجوزش خيريه | |
| حلاق الحاره وينو | |
| حلقولو نسوانو | |
| بدهن يشيلو عينو | |
| مرتو هدى ولطفيه | |
| اما عمك بو مرزوق | |
| يخرب بيتو شو حربوق | |
| من عندو جرّب تذوق | |
| بيعمل ثوره شعبيه | |
| دخل عينو بو بشير | |
| ادمي وعندو ضمير | |
| خبزاتو مرّين كثير | |
| فيهن خلطه سحريه | |
| بو غالب عندو حشمه | |
| خشمو اكبر من خشمي | |
| متل محراك الششمه | |
| وخصوصي العربيه | |
| بو خاطر من بعد سنين | |
| صابو فالج هالمسكين | |
| وابنو بسوق النحاسين | |
| مستلم المسؤوليه | |
| ياللي احمر من الحمار | |
| هوي العقيد ابو النار | |
| بحارة الضبع كانلو ثار | |
| صار بحارة الماويه | |
| عندو مساعد بجم | |
| بيقولولو بو الحكم | |
| بالقتاله لو هجم | |
| بيسوى ليره مصديّه | |
| يا بو عرب شو بيفيد | |
| لو تشتري بواريد | |
| علّم عليك العقيد | |
| جرح براس الشبريه | |
| همدت بفرد همدي | |
| وصمدت وشو هالصمدي | |
| بالاخر طلع حمدي | |
| كلب من العواينيه | |
| اما عبدو ابو العبد | |
| بيظلو جاهز للهبد | |
| اكل قتله حشك ولبد | |
| من جنود فرنساويه | |
| بو حاتم عنياتو | |
| هوي الحبكه بذاتو | |
| نفّق اغلب بناتو | |
| ومش باقي غير وحديه | |
| ضب القهوه يا مسلم | |
| عمرو ما حدا تعلم | |
| بو عادل لا تتكلم | |
| اجلها للصبحيه | |
| اما هذا ابو بدر | |
| مفكر حالو موسى الصدر | |
| لكن هوي كبير القدر | |
| عصرماية فوزيه | |
| ابو جودت هالملعون | |
| بتحسو متل المجنون | |
| عالمصاري الو عيون | |
| متل عيون الجنيه | |
| اما انت يا نوري | |
| خطيّة هالشعب السوري | |
| خرجك يا اندبوري | |
| بالقلعه كتوب وصيه | |
| هالمسلسل يا اخوان | |
| دين ومعبود العربان | |
| حتى الهند الباكستان | |
| والصين الجوانيه | |
| انشهر بسام الملا | |
| متل نيلسون مانديلا | |
| جنن العالم كلا | |
| من هالقصه الفاضيه | |
| بختم كلامي عنجد | |
| هالشغله لازملها حد | |
| واللي بيعارض هالرد | |
| ينزل تعليق عليي |
ابو القداسي ياسر الشوفي