صديق النهر
زجل لوليد رضا - 14\11\2008
| رحت مرة نهر بانياس ضفتو | |
| عزمني الحور اتمشى ع ضفتو | |
| ومتل ما بفي عاطفتو عطفني | |
| رجعت بجناح عاطفتي عطفتو | |
| قلي النهر يا شاعر وصفني | |
| بعرف للحلا بشعرك وصفتو | |
| وانا شاعر اذا بيرّف جفني | |
| لوني ع الطبيعة لون ضفتو | |
| غرقت ما بين شردي وبين صفني | |
| سبح فكري ونهر مش نهر شفتو | |
| شفتو لحن عم يشهق عْزفني | |
| بصبيع الورد قسّمتو وعزفتو | |
| شفتو نور من ظلي خطفني | |
| مرايا من صفا بالو خطفتو | |
| شفتو كرم عم يصرخ قْطفني | |
| حلي الرمّان بعبابي, قطفتو | |
| شفتو فلم ادهشني وتحفني | |
| الله صورو ومنو استلفتو | |
| شفتو ع كفوف الصخر حفني | |
| بكف الزنبق الابيض غرفتو | |
| شفتو بمولدي وشفتو بدفني | |
| وفا من جرح شرياني نزفتو | |
| وتما تبكي السما فوقو سقفني | |
| وانا بغيوم اهدابي سقفتو | |
| وانا متل النهر الله نصفني | |
| ان عطش احساس ع حسابي نصفتو | |
| الجاحد كل ما شفّي رشفني | |
| بينسا من بعد ما يبل شفتو | |
| وضمير الحق مش صدفي صدفني | |
| ولا ع بواب وهميي صدفتو | |
| ونهر بانياس من صدقي عرفني | |
| ويلّي مش متل هالنهر صادق | |
| لا نهر شْربت منو ولا عرفتو | |